Dili, 19 Septembru 2025 (Média Democracia) – Relasiona ho manifestasaun ne’ebé hala’o husi estudante Universidade sira iha resintu Universidade Nasional Timor Lorosa’e UNTL iha loron 16 Septembru mosu aktu balun ne’ebé komete husi membru PNTL liuhusi Komandante Jerál Polisia Nasionál Timor-Leste (PNTL) Komisáriu Jerál Polísia, Henrique da Costa deklara husu deskulpa ba estudante sira iha UNTL.
Nia hateten, situasaun sira ne’e mosu tanba iha ema balun mak provoka, haree de’it iha loron hira halo manifestasaun kuandu ema hotu hakmatek PNTL la halo asaun ruma maibé bainhira iha manifestante balun lansa fatuk sai ba halo polisia sira kanek no Manifestasaun sira kanek, entaun PNTL sira tenke halo asaun ruma no tenke buka tuir tanba fatuk tuda husi ne’ebá, entaun buka tuir autor ida iha parte ne’ebá nian tanba ne’e mak PNTL sira tama ba sala laran.
“Maibé depois ida ne’e ha’u rasik mak konvida alin reprezentante estudante nain 16 sira mai halo dialogu ho Polisia Nasional Timor-Leste PNTL iha Komando Jeral hodi ha’u rasik maka husu deskulpa ba sira no ha’u dehan ba sira situasaun akontese laos iha intensaun atu interven alin sira nia atividade eskola nian maibé membru PNTL no Unidade Batilliaun ordem publik BOP ne’e atu ba buka tuir autor sira ne’ebé tuda fatuk ba iha Parlamentu oin ne’e.” Dehan Komandante Jerál Polisia Nasionál Timor-Leste (PNTL) Komisáriu Jerál Polísia, Henrique da Costa ba jornalista sira iha sala VIP komando jeral PNTL kaikoli Kinta (18/09)
Nia Hatutan, ba oin komandante sei husu atu membru sira sei hadia karakter sira, nune’e futuru labele akontese tan nomos husu ba estudante sira bele organiza malu halo didi’ak bainhira iha manifestasaun labele tuda fatuk sai fali husi areadores kampus laran.
“Ami PNTL nia prezensa iha ne’ebá hodi asegura parte hotu no asegura alin sira atu nune’e alin sira hato’o hanoin ba parte ida ne’ebé alin sira atu kolia ba. PNTL sira iha ne’ebá laos atu impe ba ita-boot sira nia aula, maibé atu buka tuir autor sira tuda fatuk husi sala laran sai ba ne’e.” Komandante Jerál Polisia Nasionál Timor-Leste (PNTL) Komisáriu Jerál Polísia, Henrique da Costa
Nia informa durante iha manifestasaun ne’e parte balun mos aproveita momentu sira ne’e halo fali krime hasoru membru PNTL balun nomós parte siguransa sira ne’ebe mai fo seguransa iha manifestasaun ne’e rasik.
“Ami mós hein hela ema se mak la satisfas ho atuasaun bele mai hato’o no keisa iha komandante PNTL sira bele mós ba iha PDHJ tanba lei ne’e ba ema hotu nian ne’ebé hato’o prosesu ba ami protu ba hatan.” Informa Komandante Jerál Polisia Nasionál Timor-Leste (PNTL) Komisáriu Jerál Polísia, Henrique da Costa
Durante iha prosesu manifestasaun loron tolu ne’e iha manifestante ka estudante barak maka hetan kanek nomos iha membru PNTL nain-ualu maka hetan kanek no agora daudaun hatama hela prosesu, tanba hanesan ohin dehan ona katak lei ne’e ba ema hotu tanba ne’e ema hotu iha direitu atu hato’o keixa bainhira hetan agresaun fíziku ruma.
Reportajen : Domingas
Foto : Media Officer PNTL