Dili, 01 Abril 2026 (Média Democracia) – Komandante Jerál PNTL Komisáriu Asisténte Polísia Afonso dos Santos, propoin vaga rekrutamentu foun ba ajente polísia tenke 750 tanba eleisaun prezidensiál no Parlamentár besik ona.
“Ha’u nia opiniaun ne’e la’ós 400, maibé ha’u nia opiniaun ne’e iha rekrutamentu hamutuk-750 atu kobre hotu, tanba eleisaun besik ona, 2027 eleisaun prezidensiál, 2028 eleisaun parlamentár, entaun urjentemente rekruta ne’e la’ós 400 maibé 700 ital para ita garante fatin sira ne’e.” Dehan Komisáriu Asisten Afonso dos Santos iha ámbitu vizita traballu iha UPM tersa ne’e (31/03/2026)
Nia afirma, atu garante Eleisaun ne’ebé sei mai la’o ho di’ak tenke rekruta ajente foun sira ho númeru 700 ba leten.
“Ha’u mak Komandante Jerál nusa mak la garante, Ha’u mak Komandante Jerál ha’u deside ba Ministru hakarak ka lakohi tenke ser nune’e, tanba ejizensia barak hakarak eleisaun la’o ho di’ak.” Afirma Komisáriu Asisten Afonso dos Santos
Komandante jerál ne’e mós kompremete atu hadi’ak kestaun sira iha rekrutamentu ne’ebé sei mai.
“Agora tenke ser rekrutamentu mudansa, tanba Primeiru Ministru ko’alia tiha ona, nomos ita tenke haree komitmentu foun.” Tenik nia
Komisáriu ne’e promete sei hadia komisaun promosaun ba ajente PNTL sira inklui komisaun ba rekrutamentu, atu nune’e atu garante labele mosu tan familiarismu.
Nia fundamenta katak, rekrutamentu hotu-hotu formaliza iha Sentru Formasaun mak foin los, la’ós foti fali iha Komandu Jerál, ida ne’e la autoriza. nu’udar Komandante Jerál nia pozisaun mak nune’e no sei hadia mekanismu rekrutamentu, nune’e Ministru Interiór tenke aseita ho mekanismu refere.
Komisáriu asistente ne’e dehan nia la fó sala Ministru, sala ne’e husi komisaun tanba la sériu nune’e hodi akontese hanesan dadauk ne’ebé ema hotu hatene.
Enkuantu rekrutamentu foun ne’ebé mai ne’e Komandu mak jere, Ministériu haruka de’it ema ida ba par halo observasaun de’it. Rekrutamentu ne’e sei hala’o iha sentru formasaun hotu, Sentru Formasaun mak iha poder tomak halo buat ne’e. Komisáriu hatutan, nia parte apoia Primeiru Ministru nia hakarak ne’ebé hateten katak rekrutamentu foun ne’e tenke aplika sistema eleminatóriu.
Reportajen : Estefania
Foto : Estefania