Dili, 25 Abríl 2025 (Média Democracia) – Xefe Estadu Maior Jeneral FALINTIL-Forsa Defeza Timor-Leste (F-FDTL) Tenente Jeneral Domingos Raul Falur “Rate Laek” deklara Komandu F-FDTL iha ona planu sei halo reforma ba veteranus hamutuk nain ualunulu resin ne’ebé agora dadaun sei ativa iha instituisaun F-FDTL, reforma ne’e sei hala’o iha ambitu komemorasaun loron FALINTIL 20 Agostu ba dala 50 tinan ne’e.
Nia hatutan, dadaun ne’e tuir baze dadus Komandu F-FDTL nian iha veteranu sira ne’ebé sei ativu no sei halo funsaun iha instituisaun F-FDTL nian hamutuk nain ualunulu resin, tanba ne’e sei reforma iha ambitu komemorasaun tinan ida ne’e.
“Veteranus sira ne’ebé tempu badak sei reforma ne’e sim, laos reforma deit hanesan ne’e, maibé Estadu tenke trata sira ho di’ak. Tanba ne’e Governu liuhusi Ministru Defeza hato’o ona proposta lei ida hodi halo alterasaun ba Estatutu Militar, nune’e atu bele dignifika veteranus sira ne’ebé ativu iha instituisaun F-FDTL. Proposta ne’e aprova ona iha Konsellu Ministru, no ita sei halo reforma.” Dehan Falur ba jornalista hafoin serimónia presta omenajen ba Koronél Costantino Moreira ¨Maurega¨ iha Kuartel Jenerál F-FDTL Fatuhada.
Falur haktuir veteranus sira ne’ebé sei ativa iha instituisaun F-FDTL, fahe ba klasifikasaun luta ba libertasaun nasional, balun iha tinan 24, balun iha kontribuisaun ba luta 8 a 14, 15 a 19 no 4 a 7.
“Lei ne’e iha ne’ebá sita mós kriteriu balun kona-ba sira nia direitu, karik sira atu ba reforma, no ita sei tau matan ba ida ne’e nafatin atu nune’e sira labele sente katak laiha dignifikasaun ba sira. Tanba iha lei foun ne’e hateten hotu sira nia pensaun no saida mak sira sei halo. Prosesu administrativu ba ida ne’e lao hela.” Nia konklui.
Rekorda katak, iha loron 20 marsu tinan 2024 Ministru Defeza Pedro Klamar Fuik aprezenta proposta alterasaun ba estatutu militar hodi dignifika veteranus sira ne’ebé agora dadaun sei ativa iha instituisaun F-FDTL nune’e Konsellu Ministru aseita no halo aprovasaun.
Reportajen : Domingas
Foto : pagina ofisial FALINTL-Força Defeza de Timor-Leste
Editor : Jp.Costa