Dili, 12 Fevereiru 2026 (Média Democracia) – Relasiona ho preokupasaun publiku kona-ba engrafamentu ne’ebé kada loron sempre akontese bebeik iha kapitál Dili no rekursu polísia tranzitu mínimu hodi kontrola movimentu transporte iha estrada.
Nune’e Komandante PNTL Munisípiu Dili, Superintendente Xefe Polísia Orlando Gomes hateten, Komandu Dili koloka polísia tranzitu ofisiál suku sira iha dader hodi kontora movimentu transpote.
“Ita liga ho ita-nia kapital Dili, motor no kareta barak, tanba ne’e Komandu Dili dader koloka Tranjitu, Ofisial Suco sira, Paspol no Eskuadra sira iha fatin-fatin, nune’e kontrola movimentu trasporte, kuandu mosu engrafamentu sira bele halo intervein kedas. Banhira iha meudia ita tau tranjitu mesak mak mak kontrola.” Dehan Komandante Orlando Gomes ba jornalista sira iha Eskuadra Polísia Dom Aleixo tersa ne’e (10/02)
Komandante hatutan, rekursu polísia tranzitu limitadu nune’e koloka sira ba pontu ne’ebé hamosu engarrafamentu makás, nune’e sira ofisiáis balun ba halo atividade seluk. Maibé Komandu Munisipiu Dili nafatin zere rekursu ho didi’ak, nune’e bele hamenus engarrafamentu iha Dili laran.
“Engarrafamentu ne’e la’ós de’it iha dader, meudia no loraik, engarrafamentu ne’e mosu kualker tempu, ho ida ne’e mak ita fó ordem ona ba seksaun tranjitu para koloka membru ba iha fatin ne’ebé mak sempre mosu engarrafamentu no tempu badak mós ita sei apoiu tan ita-nia membru balun ba iha tranjitu, nune’e bele haforsa tan.” Hatutan Komandante Orlando Gomes
Komandante Orlando afirma, membru tranzitu balun moras no balun idade avansadu, tanba ne’e rekursu iha seksaun tranzitu la sufisiente.
“Tuir lolos rekursu sufisiente hela, tanba ita-nia membru tranjitu sira balun moras no balun idade avansadu, tanba ne’e mak ita buka atu haforsa tan, nune’e bela organiza di’ak Kapital Dili hodi hamenus engarrafamentu iha fatin-fatin.” Afirma Komandante Orlando Gomes
Komandante PNTL Munisípiu Dili informa, kada postu Komandu koloka membru tranzitu minímu na’in tolu, no bele mós na’in rua, tanba trajintu balun ba halo atividade seluk. Dadun ne’e membru efektivu hamutuk na’in 80 maibé tanba balu moras entaun membru sira menus ba bebeik no koloka membru balun ba iha postu 10 resin ne’ebé eziste iha kapital Dili no balun ba eskoltu apoiu seguransa no seluk ba atende asidente, tanba ne’e komandu Munisípiu Dili nafatin buka solusaun hodi rezolve engarrafamentu iha Kapitál Dili.
Reportajen : Estefania
Foto ; Estefania