Dili, 29 Jullu 2025 (Média Democracia) – Komandu Polísia Nasional Timor-Leste (PNTL) Apresia no Agradese ba sidadaun sira liu-liu juventude sira-nia partisipasaun no kontribuisaun hodi garante paz no estabilidade durante jogu desportu CPLP epoka 2025 nian hala’o iha kapital Dili durante semana rua nia laran la akontese konflitu ruma. Koferensia ne’e Media Democracia asesu liuhusi pajina ofisial PNTL, Tersa semana ne’e.
Porta-voz Komandu PNTL Superintendente Polísia, João Belo dos Reis hateten, liuhusi konferensia imprensa Segunda-feira ne’e haree ba aktividade Desportu CPLP durante semana rua nia laran lao kontroladu tebes hahu husi inisiu to’o remata, kuaze lao iha loron sanulu resin-rua nia laran, tanba ne’e Komandu PNTL hakarak apresia no agradeses ba ita hotu nia partisipasaun iha eventu desportu ida ne’e.
“Ha’u hakarak fó apresiasaun no agradese ba povo Timor-Leste liu-liu ba ita-nia Juventude sira hotu nia kontribuisaun hodi mantein paz no estabilidade durante realiza aktividade ida ne’e lao ho di’ak, nune’e hahu husi bainaka sira to’o mai, durante jogu ne’e hala’o to’o ita-nia bainaka sira fila horseik no balun fila ohin, Komandu PNTL la rejista kazu krime ruma ne’ebé akontese iha atividade ba jogu ne’e rasik.” Dehan Porta-voz Komandu PNTL Superintendente Polísia, João Belo dos Reis
Superintendente Polísia ne’e hatutan aktividade ne’e realiza durante semana rua nia laran, sidadaun hotu-hotu liu-liu joven iha ona maturidade di’ak ba bainaka sira no iha joven barak mak animadu/kontente, hakarak aprende husi maluk sira CPLP nian.
“Dezafiu iha aspektu rekursu umanu no logistika ne’ebé Komandu PNTL hasoru iha realizasaun eventu ida ne’e, ida ne’e normal, maibé ida ne’e la impede ita-nia vontade, ita-nia espíritu atu servi ita-nia povu hotu iha rai laran.” Dehan Diretor DSIKN Superintendente
Superintendente afirma durante ne’e iha atividade jogu desportivu CPLP Komandu Polisia infrenta dezafiu iha aspetu rekursu umanu nian maibé ida ne’e normal la impede espiritu vontade atu servi povu hotu liu-liu ba joven sira iha rai laran.
Esplika liután Komandu Polisia Nasional Timor-Leste (PNTL) realiza komunikadu imprensa hodi publika ba publiku katak durante realiza jogu desportivu CPLP iha semana rua nia laran PNTL la rejista kazu krime ruma, nune’e ba sidadaun hotu liu-liu ba joven sira atu mantein nafatin paz no estabilidade iha rai laran.
Reportajen : Nelfiano
Foto : Media PNTL