Dili, 17 Marsu 2026 (Média Democracia) – Komandu Polísia Nasional Timor-Leste (PNTL) Munisípiu Díli hetan orientasaun husi komandu jerál liuhusi komandu operasaun atu garante seguransa durante manifestasaun, nune’e mós asegura katak movimentu públiku la hetan impedimentu, no atividade protestu tenke realiza tuir regra sira ne’ebé defini iha Lei Manifestasaun n.º 1/2006.
“Husi Komando Munisípiu Dili hetan orientasaun husi Komando Jerál liuhusi Komando Operasoins kona-ba sira-nia manifestasaun nian, ha’u bele dehan katak komando Munisípiu Dili apoiu hodi asegura seguransa iha kapital Dili no ita nasaun demokrátiku. Iha liberdade nomós reuniaun atu bele halo espresaun iha públiku maibé ita nafatin tuir regras lei manifestasaun nian númeru 1/2006.” Dehan Komandante PNTL Munisípiu Dili, Superintendente Xefe Polísia, Orlando Gomes ba jornalista sira iha Komando Munisípiu Dili Caicoli Segunda (16/03/026)
Maske manifestante sira hatama ona karta koñesimentu ba Komandu Jerál liuhusi Komandu Operasaun, manifestasaun nafatin labele realiza iha espasu públiku tuir lei ne’ebé vigor ona. tanba ne’e ohin Komamdo Munisípiu Dili iha terrenu apoiu seguransa ba fatin refere, nune’e labele halo impedimentu ba movimentu públiku nian, katak hotu-hotu tenke la’o normal no bain-bain.
Superintendente Xefe Polísia esplika, karta koñesimentu hato’o ona ba iha Komandu Jerál semana kotuk ne’e no komandu operasaun halo ona kontaktu ho kandidatu kadetes foun atu hasoru malu hodi desidi fatin manifestasaun nian maibé sira laiha ligasaun.
Tanba ne’e, komando Munisípiu Dili mantein nafatin orden komandu ninian katak la autoriza sira halo manifestasaun iha fatin públiku, ne’ebé impedimentu ba públiku sira nomós bele interompe ensinu aprendijazen iha kampus Fakuldade Siénsias Sosiais UNTL. Kuandu sira kontinua nafatin, PNTL tenke hamamuk fatin ne’e.
Orlando informa, nu’udar Komandante Munisípiu Dili hanesan komandante taka tiha dalan ne’ebé kumpri orientasoin husi komandu jerál. Tanba seidauk iha fatin definitivu atu desidi, nune’e kadetes foun sira tur hamutuk iha Komandu Operasaun hodi bele desidi fatin.
Tuir planu Seguransa Komando Munisípiu Dili nian, koloka membru husi forsa real, husi eskuadra sira koloka hotu iha areadores Ministru Interior atu asegura, laiha akontesimentu ruma iha fatin refere.
Iha fatin hanesan, Prota-voz kadetes foun PNTL 2025 Titio Elias hateten, asaun ne’e halo bazeia ba rezultadu kadetez foun ne’ebé maioria prátika nepotizmu no familiarizmu.
“Ami husi kadetes tinan 2025 halo asaun ne’e tanba mosu sistema nopotismu, familiarismu, signifika ita laiha asaun poder. Tanba bazeia ba deklarasaun husi komisaun supervizaun ne’ebé identifika polísia nia oan 71 inklui veteranus no mártires nia oan 72, ida ne’e mak problema ba ami, ho ida ne’e mak ami nafatin ejiji atu anual total, ho númeru polisia nia-oan no veteranus nia-ona.” Dehan Prota-voz kadetes foun PNTL 2025 Titio Elias
Iha konkursu publiku sidadaun hotu-hotu iha diretu tantu veteranus nia-oan tenke priense kritéria maibé rezultadu oin seluk, tan ne’e nafatin ejiji atu anual total, hahu prosesu inisiu komisaun sira viola diploma ministerial, viola desizaun tribunal.
Nia parte mós dehan halo ona karta ba PNTL tanba atu asegura la’ós husu autorizasaun, aleinde ne’e manifestante sira mós fó karta ba Reitor maibé Reitor la atoriza fatin Kampus FCS, tanba fó oportunidade ba ensinu akadémiku.
Reportajen : Estefania
Foto : Estefania