Dili, 07 Jullu 2025 (Média Democracia) – Komandu Polísia Nasional Timor-Leste (PNTL) liu husi Diresaun Servisu Investigasaun Kriminal Nasional (DSIKN) realiza komunikadu imprensa kona-ba kazu omesídiu iha loron 06 fulan Jullu tinan 2025 oras 11 komunidade informa Polísia Munisipiu Ainaro katak sira hetan mate isin ida hamutuk ho nia motor inklui ekipamentus balun iha rai lolon bo’ot ida, Komunikadu ne’e Media Democracia asesu liuhusi Komandu Geral PNTL Caicoli Dili.
Tuir Porta-Voz Komandu PNTL Superintendente Polísia João Belo dos Reis, informa liuhusi Konferensia Imprensa hafoin hetan informasaun, Polísia Munisipiu Ainaro halo kedas intervensaun, identifika katak sidadaun ida naran Peregrina da Conceição naran istimadu Amina, ho idade tinan 23 mate iha fatin refere.
“Servisu Informasaun Polísia (SIP), Servisu Investigasaun Kriminal hamutuk ho Komandu PNTL Munisípiu Ainaro, Komandu PNTL Munisípiu Likisa, ita halo “tracking” kedas ba informasaun hirak ne’e. Ita rekolla no ikus mai hori-kalan (06/07) iha oras 09:00 kalan, Suspeitu ho inisial M.D ita kaptura iha Munisípiu Dili área Dom Aleixo ninian.” Dehan Porta-Voz Komandu PNTL, João Belo dos Reis
Nia informa aleinde ne’e, hakarak informa ba públiku katak Suspeitu iha ona Polísia nia liman, iha Sela Detensaun Eskuadra PNTL Dom Aleixo, Comoro hodi hein prosesu tuir mai.
“Kronologia husi akontesimentu ne’e, ha’u labele koalia iha ne’e tanba hola parte iha Segredu Justisa no agora dadaun prosesu investigasaun sei lao hela.” Hateten Porta-voz Aktual Diretúr Diresaun Servisu Investigasaun Kriminal Nasional (DSIKN)
Aktual Diretúr Diresaun Servisu Investigasaun Kriminal Nasional (DSIKN) hakaraik-án hakarak informa mós katak mate isin orseik kedas evakua ona mai Dili, agora iha ona Hospital Nasional Guido Valadares (HNGV) hodi hein prosesu Autopsia.
Esplika liután relasiona ho kazu ne’e prosesu Autopsia sei termina katak mate ne’e kauza husi oho ka ema baku, investigasaun sei lao hela no ema ne’ebé ita deskonfia envolve iha kazu ne’e, ita asegura ona no vitima origem husi suku Asumanu, Munisipiu Likisa, suspeitu sei kumpri iha Sala Detensaun durante oras 72 nia laran hafoin sei aprezenta ba Ministeriu Públiku (MP).
Reportajen : Nelfiano
Foto : Media PNTL