Dili, 25 Marsu 2025 (Média Democracia) – Selebrasaun Aniversáriu Administrasaun Portu Timor Leste, Institutu Públiku. (APORTIL.IP) ba dala 22, funsionáriu sira husi APORTIL realiza atividade doasaun raan, hodi tulun pasiente sira ne’ebé presiza raan hodi salva ema nia moris.
Reprezentante Prezidente APORTIL Vogal II Konsellu Administrasaun APORTIL Leandro de Sena hateten, atividade doasaun raan ne’ebé ohin APORTIL halo ne’e hodi ajuda maluk sira ne’ebé presiza raan.
“Ambitu komemorasaun APORTIL iha loron 10 Marsu ba dala 22 hafoin Timor-Leste restaura independensia, atividade ne’ebé ami realiza kuda-ai-oan iha Lahane Osidental, hodi halo matak ita-nia rai no foho, segundu doasaun raan, hakarak ajuda ema moras sira ne’ebé presiza raan.” Dehan Vogal II Konsellu Adminitrasaun APORTIL Leandro de Sena ba Jornalista sira iha Edifísiu Aportil I.P Segunda-Feira (25/03/2025).
Nia informa, banku de sangue mós hasoru difikuldade kona-ba raan, tanba ne’e aproveita selebrasaun aniversáriu ne’e APORTIL halibur funsionáriu, liu-liu ba sira ne’ebé kondisaun di’ak bele oferese sira nia raan.
“Tanba ho doasaun raan ne’e hodi tulun HNGV no maluk sira ne’ebé moras iha hospital presiza raan, ida nee mak objetivu ba atividade ohin loron nian.” Nia Informa
Atividade doasaun raan ne’ebé Oferese husi Funsionáriu APORTIL ne’e halo hodi tulun pasiente sira ne’ebé presiza raan iha Hospitál Nasionál Guido Valadarez.
“Doasaun raan ne’e husi funsionariu APORTIL, tuir lista nain 20 maibé ohin iha ema balu mós iha inisiativa no hakarak rasik mai apoiu tan raan, nune’e total hamutuk 30, ami agradese ba sira ne’e mai kontribuita tan.” Nia dehan
Iha fatin hanesan, Xefe Interina Departamen Banku de Sangue Maria do Rosario Aleixa Berek haktuir, ohin husi banku de sangue Hospital Nasional Guido Valadares mai iha fati ne’e hodi halo doasaun raan ba funsionáriu husi APORTIL nian ne’ebé sei hasai raan.
“Ohin loron ami husi HNGV liuhusi Banku de Sangue hala’o doasaun raan iha fatin ne’e, Tanba ita hatene realidade iha HNGV pasiente barak presiza tebes raan, tan ami agradese tebes, iha biban ne’e ba APORTIL ne’ebé halo ona doasaun raan hodi bele salva pasiente barak.” Nia haktuir
Nia esplika, kritéria haree ba ema nia kondisaun fiziku saudavel, iha saude mental nomos fiziku, nia laiha moras ruma, nia la konsumu aimoruk ruma bele afeita ba iha kualidade raan, nia tenke deskansa oras 8 nia laran, nia deskansa ho diak bele doasaun raan.
Entretantu iha Atividade ne’e hetan partisipasaun husi Funsionáriu Aportil.I.P hamutuk 30 resin nomos husi parte saúde sira.
Reportajen : Estefania
Foto : Estefania