Dili, 13 Outubru 2025 (Média Democracia) – Komemorasaun loron mundiál ba labrik-feto, Lucia Maria Amaral husi Munisípiu Ainaro, Postu-Administrativu Hatudu, Suku Leolima, eskola iha Universidade Timor-Lorosa’e, Fakuldade Edukasaun, Departamentu Lingua portuguesa, asume pozisaun Sekretária Estadu ba Igualdade hodi lidera S.E.I durante oras rua. Komemorasaun ne’e Média Democracia asesu husi pajina S.E.I Segunda semana ne’e.
Sekretáriu Estadu ba Igualdade-SEI, Elvina Sousa Carvalho hateten, Loron Mundiál ba Labarik-Feto nu’udar loron ne’ebé selebra globalmente hodi fó onra ba Labarik-Feto sira, halo advokasia hodi muda sira-nia kondisaun atu hetan oportunidade aprende, Lidera, Deside no Moris la ho Diskriminasaun.
“Sekrtária Estadu ba Igualdade akompaña husi jerente S.E.I hodi simu Lucia Maria Amaral assume pozisaun Sekretária Estadu ba Igualdade lidera atividade enkontru jestores S.E.I durante oras rua hodi ko’alia kona-ba loron mundiál ba labarik-feto ho tema Hapara Kaben no Uniaun de Faktu Sedu no Forsadu liga ho estratéjia S.E.I halo advokasia ba assuntu kaben sedu, no kauza prinsipál ne’ebé kontribui ba kaben sedu no preparasaun ba komemorasaun loron internasioál ba feto rurál tinan 2025.” Dehan Sekretária Estadu ba Igualdade-SEI, Elvina Sousa Carvalho
Sekretária Estadu hatutan, hato’o apresiasaun ba Plan Internasionál nia programa anuál ne’ebé atu empodera no fó oportunidade labarik-feto sira no motiva labarik feto sira bele prepara-an ba sira-nia mehi iha futuru.
“Hato’o apresiasaun ba Plan Internasionál ba programa anuál ne’ebé sempre realiza ho intensaun atu empodera no fó oportunidade labarik-feto sira no motiva labarik feto sira no prepara labarik feto sira atu bele prontu duni sira-nia mehi ka atu sai ema ne’ebé iha kualidade no preparadu ba future, tinan-tinan S.E.I sempre hamutuk ho Plan Internasionál fó oportunidade ba alin feto sira atu “take over” bele oras tolu haat.” Hatutan Sekretária Estadu ba Igualdade-SEI
Sekretaria Estadu afirma, ohin alin feto ida ne’ebé iha korajen no iha koñesimentu ne’ebé kle’an kona-ba promosaun igualdade no inkluzaun, mai husi espriénsia rasik no hanesan portadora defisiénsia nia prezensa mós fó korajen ba feto maluk sira no joven feto sira, aumezmu tempu fó mós korajaen ba maluk defisiénsia fizika sira atu nafatin prepara sira-nia-an no kapasita sira-nia-an, hodi realiza mehi iha future.
Iha fatin hanesan Alin Feto, Lucia Maria Amaral hato’o agradese-wain, tanba bele hetan oportunidade assume pozisaun nu’udar Sekretária Estadu ba Igualdade.
“Obrigada tebes ba oportunidade tanba Sekretária Estadu ho nia estrutura sira bele fó espasu ba ha’u feto ida ne’ebé ho defisiénsia bele assume pozisaun hanesan Sekretária Estadu ba Igualdade hodi lidera iha oras balun nia laran.” Dehan Alin feto Lucia Maria Amaral
Nia hatutan, atividade Labarik Feto Asume Pozisaun hala’o tinan-tinan iha ambitu komemorasaun loron mundiál labarik-feto ho objetivu hodi motiva no haforsa labarik-feto sira-nia pozisaun atu hetan esperiénsia negosiasaun, foti desizaun, polítika no reprezenta Lideransa Nasionál nu’udar prosesu aprendizajen.
Aleinde ne’e atividade labarik-feto asume pozisaun realiza Sekretaria Estadu ba Igualdade servisu hamutuk ho parseiru Plan Internasionál iha Timor-Leste, ne’e hanesan materia ida importante ba futuru.
Esplika liután Komemorasaun Loron Mundial Labarik Feto ne’e partisila husi Labarik feto Asume Pozisaun mai husi área rural hanesan, Munisípiu Aileu, Ainaro no Manufahi ne’ebé reprezenta labarik feto hotu iha Timor-Leste.
Reportajen : Nelfiano
Foto : Media S.E.I