Dili, 10 Outubru 2025 (Média Democracia) – Liuhusi komunikadu imprensa ne’ebé realiza iha Polisia Akademika CFP Comoro komisaun rekrutamentu ba kadetes foun PNTL tinan 2025 informa, ohin hahu ona distribuisaun materia ezame ba kadetes foun ba pontu fokal kada Munisipiu idaidak.
Porta-voz Komisaun Rekrutamentu Polísia Nasional Timor-Leste (PNTL), Superintendente Antonio da Luz informa, ohin loron Sexta 10 fulan Outubru tinan 2025 komisaun hahu halo distribuisaun materia ezame sira ba pontu fokal iha Munisipiu hodi halo preparasaun ba ezame ne’ebé sei tuir mai.
“Tanba ne’e husu ba kandidatu sira iha loron Sabadu 11 fulan Outubru tinan 2025, ita-boot sira ba fatin ezame nian kada eskola iha munisipiu ida-idak ne’ebé fó sai tiha ona no haree ita-boot sira nia naran ne’ebé taka sai iha kada aula.” Dehan Porta-voz Komisaun Rekrutamentu Polísia Nasional Timor-Leste (PNTL), Superintendente Antonio da Luz
Porta-voz hatutan, atributu sira ne’ebé kandidatu sira presiza lori iha ezame nian antes ne’e fó sai ona maibé hanesan komisaun repete fila-fali ba material sira mak lapis tenke 2B, regua, afiadór, apagadór nomos kartaun eleitoral, Bileti Identidade (BI) original atu bele ba hatudu ekipa fiskalizador sira molok tama sala aula.
“Komisaun repete fila-fali ba Orariu prova kultural ba kadetes foun PNTL nian sei realiza iha loron Domingo 12 fulan Outubru tinan 2025, oras 07.00-8.00 kandidatu sira iha ona fatin ezame nian, 08.00-08.45 instrusaun ba kandidatu sira, 08:45-09:45 kandidatu tama aula hodi halo preparasaun ba ezame, 09:45-09:59 distribuisaun materia ezame ba kandidatu sira, 10:00-12:30 hahu ezame to’o remata.” Hatutan Porta-voz Komisaun Rekrutamentu Polísia Nasional Timor-Leste (PNTL)
Husu ba kandidatu sira atu hakbesik ba fatin ezame atu bele partisipa iha ezame ne’e no husu ba kadetes foun sira labele tarde, balun ne’ebé hela dook husi Postu-Administrativu sira karik bele mai hela besik iha Munisipiu loron Sabadu atu nune’e Domingo bele partisipa ezame labele tarde.
“Orariu ne’ebé komisaun rekrutamentu PNTL fó sai ona ba kadetes foun sira labele tarde, no kandidatu Polísia foun tenke kumpri oras, tenke disiplina, se la disiplina oinsa tama formasaun sai Polísia ida. Tanba ne’e mak husu ba oan sira tenke disiplina tempu.” Afirma Porta-voz Superintendente Antonio da Luz
Komisaun reafirma tan, repete fila-fali haree ba fatin ne’ebé kandidatu sira atu ba tuir ezame iha ida-idak ninian Munisipiu no fatin eskola sei realiza ezame, hahu husi Munisipiu Aileu, fatin ezame nian iha eskola Tekniku Vocasional Aileu Villa ho ESGAM Aileu. Iha Minisipiu Ainaro fatin ezame nian iha eskola Ensino Basico Venancio Fraz Ainaro. Atauro fatin ezame iha Eskola Secundario Geral 99 Atauro. Baucau fatin ezame iha Ensino Secundario Geral Nu.2 Villa Nova Baucau. Bobonaru fatin ezame iha Ensino Secundario Jeral Dom-Martinho da Costa Lopes Maliana. Covalima fatin ezame iha Ensino Geral Seran-Kotek Suai.
Komisaun husu ba kadetes sira ne’ebé atu tuir ezame iha Munisipiu Dili fahe ba fatin ezame rua, Sentru Formasaun Polisia nian sei halo iha Eskola Baziku Sentral 30 de Agostu Comoro ho eskola 5 comoro, ba kadetes sira ne’ebé rejistu iha sentru formasaun polisia akademika, iha fatin segundu mak Munisipiu Díli sei hala’o ezame iha ESTV Becora, no ESTV 28 Novembro Becora.
Munisipiu Ermera sei hala’o ezame Eskola Jeral Nino Conis Santana no Eskola Sekundariu 10 de Abril Ermera. Munisipiu Lautem fatin ezame iha Ensino Jeral Nino Conis Santana Lautem. Liquisa fatin ezame iha Ensino Baziku Nu.1 Liquisa. Manatutu fatin ezame Ensino Sekundariu Jeral Kayrala ho Eskola publiku Biadi.
Porta-voz konklui, ikus liu fatin ezame ba Munisipiu Manufahi fatin ezame iha Ensino Sekundariu jeral 1912 manufahi, Oecussi fatin ezame iha EBC+EBF 1 de Maio Palaban, Viqueque Eskola sekundariu jeral 4 de setembro Viqueque no ensino baziku 01 Beloi.
Reportajen : Domingas
Foto : Domingas