Dili, 01 Abril 2026 (Média Democracia) – Komandante Jerál Polísia Nasionál Timor-Leste, Komisáriu Asisténte Polísia Afonso dos Santos husu ba Unidade Polísia Marítima labele envolve-an iha atividade ilísitu.
Komisáriu Asistente ne’e dehan iha atividade ilísitu ne’ebé ema hatama sasán husi Tasi Indonézia mai tasi Timor tuir informasaun ne’ebé iha katak Polísia Eskudra sira maka envolve.
“Ha’u la rona membru Polísia Martima envolve iha laran, ha’u apresia ho mota boot sira, tanba ne’e husu atu ita-boot sira mantein nafatin, nomos ha’u sei haree buat ne’ebé imi presiza.” Dehan Komisáriu Afonso ba jornalista sira hafoin vizita Unidade Polisia Máritima iha Seonál Lesidere Tersa (31/03/2026)
Aleinde ne’e, Komandante Jerál Polísia Nasionál Timor-Leste, Komisáriu Asisténte Polísia mós husu ba membru Unidade Polisia Máritima atu serbisu ho dignidade.
“Imi serbisu ho dignidade, serbisu ho orden, responsabilidade komandu, Ha’u hakarak imi serbisu hamutuk ho F-FDTL liliu Komponente Navál.” Hatutan Komandante Jerál Polísia Nasionál Timor-Leste, Komisáriu Asisténte Polísia
Durante mandatu hanesan Komandante Jerál nia sei fó prioridade ba unidade tolu hanesan Unidade Espesiál Polísia, Unidade Polisia Máritima no Unidade Patrollamentu Fronteira.
“Iha ha’u nia mandatu ha’u sei haree liubá UEP UPM no UPF, ha’u hakarak unidade tolu avansa no dezenvolve iha ha’u nia mandatu tanba unidade tolu importante, iha situasaun ne’ebé ladiak unidade tolu ne’e mak sei halo intervensaun.” Afirma Komandante Jerál Polísia Nasionál Timor-Leste, Komisáriu Asisténte Polísia
Nia komprometidu katak durante mandatu sei tau matan ba ekipamentu no rekursu iha Unidade Polisia.
“Ha’u nia hanoin maka ne’e ha’u sei kaer PNTL unidade tolu tenke avansa, ne’e ita iha rekrutamentu no rekrutamentu ne’e sei tau joven sira para futuru ne’e bein formadu.Ha’u husu ba membru tomak serbisu nafatin, hanesan komandante jerál sei haree buat ne’ebé imi presiza.” Informa Komandante Jerál Polísia Nasionál Timor-Leste, Komisáriu Asisténte Polísia
Iha fatin hanesan Komandante Unidade Polisia Máritima Superentente Xefe Eugénio Pereira hateten, vizita Komandante Jerál PNTL ne’e atu haree kestaun estratéjia no situasaun UPM nian.
“Ho vizita ne’e Komandante Jerál foti nia responsabilidade hanesan Komandante Jerál bele buka solusaun ba difikuldade no dezafiu ne’ebé Unidade Polisia Máritima iha.” Dehan Komandante Unidade Polisia Máritima Superentente Xefe Eugénio Pereira
Nia informa, problema ne’ebé durante ne’e UPM iha mak infrastrutura ba operasaun, tanba tuir lei orgánika PNTL nia UPM sei iha Batallaun ida ne’ebé sei halo serbisu ba operasaun sira iha tasi. Tanba ne’e presiza kria infrastrutura, nune’e ba oin Unidade Polisia Máritima bele halo serbisu ho di’ak liután.
Komandante Eugénio hateten, kolokasaun rekusu ladauk sufisiente maibé kona-ba no fasilidade transporte martima dadaun ne’e sufisiente, tanba iha Ró Lucitania ne’ebé hahú hala’o operasaun. Aleinde ne’e UPM mós sei iha tan ró seluk hodi hala’o servisu.
Reportajen : Estefania
Foto ; Estefania