Dili, 02 Setembru 2025 (Média Democracia) – Hanesan parte ida husi Dili International Trade Expo 2025, PT Valente Tirta Internasionál, empreza bee minerál sede iha Jakarta, ho Fresca Water Timor-Leste formaliza akordu kooperasaun servisu ba produsaun bee-minerál iha Timor-Leste.
Tuir ofisiál empreza Valente dehan, mákina produsaun Fresca Water hotu-hotu prienxe padraun internasionál, garante bee-moos ba povu Timor-Leste.
“Ida-ne’e hanesan memorandu entendimentu ida. Ami husi PT Valente Internasionál, empreza bee-minerál ida ne’ebé bazeia iha Jakarta. Ami hakarak kolabora iha produsaun. Entaun ami iha marka ida no sei produz Fresca Water. Ha’u haree sira nia fábrika ne’e klaru tebes.” Dehan reprezentante Valente Internasionál, Ahmad Hadari, ba jornalista sira iha CCD.
Nia informa, ida ne’e krusial atu fornese bee-minerál ho kualidade adekuadu ba povu Timor-Leste hodi konsume, tanba ne’e sira iha interese atu kolabora di’ak ho kompaña sira iha Timor-Leste, hahu ohin sei serbisu hamutuk ba to’o futuru.
“Ohin ami mai iha ne’e atu tur hamutuk hodi koalia mós ho kompaña sira iha Timor-Leste no ami asina ona memorandu entendimentu ida nune’e ami sei hahú servisu iha tinan 2026.” Informa reprezentante Valente Internasionál, Ahmad Hadari
Reprezentante Indonézia ne’e esplika, ho formaliza akordu ne’e, sira sei fornese mákina produsaun ba kompañia Agua Fresca nune’e sira mós bele produz sira nia marka bee-minerál iha Timor-Leste.
“Sim, ami sei komersializa mós iha Timor-Leste, maibé produtu ne’e sei produz husi Fresca, ami mós sei esforsa atu garanti katak, bainhira Timor-Leste ofisialmente sai hanesan membru ASEAN nian, ami sei iha oportunidade hodi halo esportasaun ba nasaun sira seluk, hanesan Portugál no nasaun sira ne’ebé asosiadu ho Timor-Leste.” Esplika reprezentante Valente Internasionál, Ahmad Hadari
António Lay, CEO Agua Fresca subliña, Valenti hanesan empreza ida ne’ebé rekoñesidu internasionalmente. Kompañia Indonézia ne’ebé ita kontaktu ne’e aprezenta husi Ekipa Tri Invest.
Reportajen : Domingas
Foto : Domingas