Dili 10 Dezembru 2025 (Média Democracia) – Komunidade Munisípiu Lautem, Postu-Administrativu Iliomar, abitante Suku Caenlio, Aldeia Larimi no Suku Tirilolo, realiza konferensia imprensa hodi rejeita ho deklarasaun falsu husi Deputadu inisial AQ iha Parlamentu Nasional. Konferensia ne’e hala’o iha Jardim 05 de Maio Dili.
Porta-voz Aldo da Costa Alves hateten, hanesan Komunidade Iliomar liga ho publikamente ho indignasaun ne’ebé kle’an no dignidade hasoru deklarasaun falsu neʼebé hato’o husi Deputadu AQ, durante sesaun parlamentár nia afirma laiha komunidade hela iha Tirilolo to’o Baguia.
“Ami Komunidade Postu Iliomar Suku Caenlio, Aldeia Larimi no Suku Tirilolo, espresa publikamente ho indignasaun ne’ebé kle’an firmeza no dignidade hasoru deklarasaun falsu no seriu enganozu neʼebé hato’o husi Deputadu AQ iha Parlamentu Nasionál. Katak “laiha komunidade hela iha Tirilolo, Larimi to’o Vatucarbau no Baguia. Deklarasaun ne’e bosok ida ne’ebé perigozu, polítikamente destrutivu. Tanba desprezu absoluta ida ba realidade ne’ebé esperimenta husi ema sira servisu no luta loron-loron atu moris iha Iliomar.” Dehan Porta-voz Aldo da Costa Alves
Porta-voz hatutan, dadus demográfiku ofisiál, Tirilolo nu’udar Suku ida ne’ebé populadu liu iha Iliomar. Ho deputadu nia deklarasaun katak laiha populasaun iha Tirilolo no Larimi ne’e falsu, laiha responsabilidade no ofensivu.
“Ezisténsia povu ida nian labele hamoos ho liafuan ho lia-bosok ne’ebé hasai husi Parlamentu. Família ne’ebé moris tuir dalan la’os invensaun, la’os sombra, la’os de’it numeru. Ema loloos, uma, ai-horis, animál, tradisaun no istória harii iha jerasaun ba jerasaun. Nega ezisténsia komunidade nian hanesan nega umanidade, lia-loos no insulta diretamente ita hotu nia dignidade, Deputadu AQ troka lia-loos ho ignoránsia no troka dadus tékniku ba narrativa falsu no manipuladu.” Hatutan Porta-voz Komunidade Iliomar
Nia afirma, estudu sira ne’ebé hala’o husi tékniku nasionál hatudu dalan alternativu ne’ebé defende husi Deputadu sei rezulta estragu ambientál sira maka’as iha área floresta ida ne’ebé sensivel, kustu aas liu. Tanba ne’e distánsia no difikuldade husi terrenu no sei fó benefisiu ba populasaun ituan de’it.
“Estrada liuhusi Larimi ne’e estratéjiku, tanba reprezenta ligasaun sentrál entre Viqueque, Baucau no Lautém, hametin mobilidade rejionál. Maske iha faktu hirak ne’e, Deputadu deliberadamente ignora ofisial povu sira, prefere atu aprezenta argumentu sira lahó baze téknika ruma halo alegasaun falsu kona-ba erozaun, kontradiz relatóriu Deputadu la halo inspesaun iha fatin, la vizita komunidade sira, no la rona peritu sira. Área Caenlio, Tirilolo, Larimi la adekuadu tanba rai-halai, ida ne’e bosok no nia laos ema geólogo.” Afirma Porta-voz
Porta-voz informa, Deputadu ne’e tinan barak tur iha Parlamentu, supostamente atu defende povu Iliomar, maibé hili nonok. Enkuantu Iliomar luta ba bee, eletrisidade, estrada, saúde no edukasaun, Deputadu ne’e nunka hasa’e lian. Nia nunka lori problema ne’e ba Parlamentu. Nunka tau ain iha rai hodi haree realidade ne’ebé povu Iliomar hasoru. Hafoin tinan barak auzénsia, mosu de’it atu koko trava dezenvolvimentu, la’os reprezentasaun polítika. Ida-ne’e abandonu no laiha responsabilidade.
Esplika liután liuhusi Komunikadu Imprensa ida ne’e povu Iliomar iha direitu atu hatene, tanba saida mak Deputadu iha hanoin atu muda projetu ida ne’ebé iha ona aprovasaun téknika, Sé maka hetan benefisiu husi mudansa ida-ne’e. Tanba sa nia insiste atu prejudika sidadaun rihun ba rihun ho proposta ida ne’ebé laiha baze.
Reportajen : Nelfiano
Foto : Nelfiano