Oe-Cusse, 27 Janeiru 2025 (Média Democracia) – Organizasaun naun Governamental (ONG), Permatil susesu hatudu rezultadu di’ak kee-debu iha laletek foho Leolbatan, aldeia Lakofoan suku Costa sub-rejiaun Pante Makasar, Rejiaun Administrativa Espesial Oe-kusse Ambenu (RAEOA).
Tuir Koordenador Permatil Oe-kusse Arnold Suni hateten, iha tinan 2022 ho inisiativa indentifika bedu antigu iha laletek foho Leolbatan nian, hala’o servisu voluntariu hamutuk ho komunidade sira kee-bee debu hodi kuda bee matan
“Iha tinan 2022 ha’u rasik mobiliza komunidade husi aldeia lakofoan hodi servisu voluntariu hodi kee-debu antigu iha foho Leolbatan, nune’e bele kuda udan been, hodi hamoris bee matan tanba komunidade sira iha aldeia Lakonfoan tinan barak nia laran uza udan been fasilita ba nesesidade moris.” Dehan Koordenador Permatil Oe-kusse, Arnold Suni
Nia hatutan foufoun tama iha aldeia Lakofoan kee-debu ne’e komúnidade hotu la fiar, maibé enkoraza no esplika ba komunidade kona-ba prosesu ida ikus mai bee matan antigu sira moris fali, ohin loron ita haree susesu di’ak tebes bee matan antigu sira maran ne’e moris fali no ita-nia Komunidade uza to’o agora bee la maran ona
“Permatil tama iha aldeia Lakofoan iha tinan 2022 hodi identifika bee matan antigu sira iha foho hun ne’e sukat nia volume ne’e ki’ik tebes depois nafatin koordena ho Autoridade Komunitariu, Komunidade inklui lia nain sira aseita ona foin bele halo tuir lisan no kultura oho manu mean husu matak malirin husi natureza hafoin bele kee-bee debu.” Dehan nia
Nia salienta iha prosesu koordenasaun halo tuir kultura no lisan aldeia Lakofoan hodi husu lisensa ba natureza nune’e hodi oho manu mean ne’ebé hatudu rejultadu di’ak, foin organiza kee-bee debu to’o ikus iha benefísiu ne’ebé di’ak, bee matan antigu iha foho hun komesa moris.
“Komunidade sira iha aldeia Lakofoan sente kontente tanba iha tempu bailoron naruk bee matan moris sempre moris natafin no lamenus hanesan tempu uluk ne’ebé seidauk konserva bee-debu.” Nia haktuir
Nia afirma bee matan antigu iha tempu uluk bailoron maran no menus, ne’e kauza husi hahalok komunidade nian la tau importansia ba natureza no ambiente, halo to’os kada tinan sempre muda ba mai estraga ai-horis sunu rai arbiru rejultadu bee matan maran no menus.
“Komunidade sira halo to’os muda ba mai husi fatin ida ba fatin seluk, hanesan mós kultura ne’ebé bei-ala sira iha tempu uluk to’o agora, agrikultor sira kontinua halo to’os muda ba mai tanba hakarak ai-han ne’ebé sira produz bele hetan benefísiu ne’ebé di’ak. Maibé la hatene buat hira ne’e kauza ba bee matan antigu sira bele maran no menus.” Nia informa
Nia informa prátika komunidade sira nian durante ne’e sempre halo to’os muda ba mai no la permanente, ne’e hanesan mós husi bei-ala sira nia tempu to’o agora komunidade jerasaun foun sira nafatin banati tuir.
Esplika kle’an liután katak dadus estatistika sensu uma nian iha Timor-Leste ba tinan 2022, komunidade uma-kain nain 182 iha aldeia Lakofoan asesu ona bee matan ne’ebé durante ne’e Permatil servisu ho komunidade hodi kuda bee matan iha laletek foho Leolbatan.
Reportajen : Nelfiano
Foto : Nelfiano