Dili, 23 Jullu 2025 (Média Democracia) – Jurista Timoroan Sérgio Dias Quintas hateten, husu Estadu atu kria sentru juvinil ida ba joven liu-liu labarik minoridade ne’ebé pratika krime hodi sulan sira iha sentru juvinil.
Jurista Timoroan Sérgio Dias Quintas afirma, labarik minoridade ne’ebé Pratika krime tau sira iha sentru juvinil atu eduka sira-nia mentalidade, nune’e ba futuru sira sai husi sentru juvinil sira bele re-intrega iha sosiedade mai ho Skill ida no kapasita liuhusi formasaun mentalidade no formasaun iha área seluk.
“Sentru juvinil ne’e importante tebes atu Governu bele estabelese tanba ita hatene, iha kodigu penal labarik sira ne’ebé ho idade 16, mai kraik ne’e imputalidade razaun idade, entaun sira lebele hetan responsabilidade kriminal.” Dehan Jurista Timoroan Sérgio Dias Quintas
Nia hatutan, bainhira lei defini katak, sira laiha responsabilidade kriminal, entaun sira labele kastigu hamutuk ho ema idade maioridade. Tanba ne’e Governu tenke kria kondisaun ida hanesan sentru juvinil, nune’e bele tau sira iha fatin seguru hodi fó mós formasaun ruma hodi muda sira-nia mentalidade.
“Ita enkoraja ba Governu atu harii no estabelese sentru juvinil, tanba sentru juvinil ne’e importante tebes la’os labarik sira pratika tiha krime depois ita husik livre de’it ne’e la di’ak. Nune’e mós inan aman labele hanoin katak, labarik sira ne’ebé minoridade ses husi sira nia responsabilidade.” Hatutan Jurista Timoroan Sérgio Dias Quintas
Nia afirma, labarik ne’ebé minoridade pratika krime ne’e tratamentu ba sira laiha diferensa ho ema bo’ot, sulan sira iha sentru juvinil ho tratamentu hanesan maibé sira labele kastigu ho ema bo’ot bainhira kastigu hamutuk entaun sei hamosu fali buat ruma husi ema bo’ot sira.
“Entaun sulan sira iha fatin ketak liu-liu iha sentru juvinil atu eduka sira liuhusi Edukasaun formal no Edukasaun informal. Edukasaun formal mak estadu bele kria kondisaun haruka Professor ba hanorin sira iha sentru juvinil nomos iha tekniku balu ne’ebé iha Skill bele hanorin sira iha sentru juvinil.” Afirma Jurista Timoroan Sérgio Dias Quintas
Nia salienta, kuandu labarik minoridade ne’ebé Pratika krime juiz kondena sira tama iha sentru juvinil ida ne’e la’os husi Instituisaun seluk mak haruka maibé ida ne’e liuhusi desizaun tribunál mak ba sulan sira iha sentru juvinil ho forma ida katak, eduka sira maibé ida ne’e mós hanesan espesie pena maibé la’os pena ida ne’ebé deskreve Kodigu Penal.
“Ami haree minoridade ne’ebé pratika krime ruma mai iha tribunál Juiz tenke konprova ho sertidaun nasimentu haree idade labarik minoridade kalae, karik labarik sira ne’e idade minoridade laiha dalan seluk Juiz sei absolve sira tanba estadu seidauk kria kondisaun ida atu kondena labarik sira.” Salienta Sérgio Dias Quintas
Nia informa durante ne’e labarik lubuk ida ho minoridade pratika krime mai iha tribunál maibé tanba ita-nia kodigu penal dehan katak, labarik ne’ebé ho idade ka minoridade sira sei la hetan responsabilidade kriminal.
Esplika liután bainhira labarik sira pratika krime mai tiha tribunál mak haree ho razaun imputalidade idade pisikolojiamente sei afeita ba sira tanba buat ne’ebé sira pratika sai hanesan baibain ona. Tanba ne’e husu ba estadu tenke kria sentru juvinil atu tau labarik sira ne’ebé pratika krime, nune’e bele fahe formasaun ba sira hodi hametin sira nia mentalidade sai di’ak iha futuru.
Reportajen : Nelfiano
Foto : Nelfiano