Dili, 23 Outubru 2025 (Média Democracia) – Ministeriu Saude liuhusi Diretor Jeral Kuidadu Saúde Primária (KSP), hamutuk ho parseru WHO nomos Diretor Munisípiu sira realiza workshop diskute kona-ba apoiu teknika ba governu bele hadia aspétu nutrisuan iha nivel ospital iha Timor-Leste. Workshop ne’e hala’o iha Delta-Nova.
Tuir Diretora Jeral Kuidadu Saúde Primária, Elizabeth Letomau hateten, ohin realiza workshop ida-ne’e hodi fó kontribuisaun no mellora ba sistema saúde hodi buka konsénsu no validasaun kolektivu ba aspétu servisu nutrisuan iha ospitais sira iha Timor-Leste.
“Ohin momentu importante ida-ne’e fó kontribuisaun no mellora ba sistema saúde iha Timor-Leste. Ha’u sente orgullu tebes iha ita-nia hamutuk fó oportunidade atu buka konsénsu no validasaun kolektivu ba dokumentu importante tebes neʼebé bele hadia aspétu servisu nutrisuan iha ospitais sira. Ita-nia ospitál sira la’os de’it fatin atu trata pasiente ho medikamentu, maibé mós presiza garante pasiente sira simu hahan neʼebé seguru, nutritivu no ba prosesu rekuperasaun nian.” Dehan Diretora Jeral KSP, Elisabeth Leto-Mau
Diretora Jeral KSP hatutan, objetivu husi worshop ne’e atu diskute kona-ba pontu manual tolu, oinsá bele hadia di’ak liu iha futuru. Nune’e dokumentu sira tenke la’o ho atensaun seriu ba manual importante ne’e.
“Manual tolu importante iha dokumentu sira hanesan, Manual Refeisaun Hospitalar – sei orienta servisus preparasaun hahan ba pasiente sira iha ospitáis sira hotu. Manual ida ne’e sei ajuda fó padronizasaun no klaridade kona-ba menu, porsaun no forma servisu hanesan baseia ba kondisaun klinika pasiente nian.” Hatutan Diretora Jeral Kuidadu Saúde Primária
Diretora afirma, Guia prátika di’ak ba Higiéne Alimentár – importante tebes atu prevene moras sira neʼebé bele surgi tanba han ne’ebé kontamina, prepare ho forma di’ak, ka iha ambiénte ne’ebé seguru.
“Ita bele halo esforsu mediku ida boot, maibé se han la seguru, pasiente sei bele moras tan, no Manual Nutrisaun Hospitalar bele servisu hanesan referénsia ba tékniku saúde no profisionál nutrisuan, atu determina preskrisaun dietétika neʼebé adekuada ba pasiente ho moras sira ne’ebé diferente. Nutrisaun iha impaktu direta ba prosesu trata no rekuperasaun pasiente.” Afirma Diretora Kuidadu Saúde Primária
Diretora informa, fó obrigadu ba ekipa téknika sira husi Diresaun Nasional Nutrisuan nomos ba suporta husi parseiru sira hanesan OMS (WHO), UNICEF, WFP no organizasaun sira seluk ne’ebé kontinua fó apoiu teknika ba Governu hodi hadia aspétu nutrisuan nian iha nivel ospitalar.
Entertantu apelu ba Diretores no Gestores ospitál sira, atu fó prioridade ba área nutrisuan, hodi bele garante sistema saúde, maibé iha nivel hanesan ho tratamentu médiku.
Esplika liután atividade ne’e sei hala’o durante loron rua, partisipa husi Diretor Exekutivu Hospital, Diretor ADT, Diretor Nasional, Xefe Departamentus, Xefe KSI, Representante husi OMS nomos Instituisaun relevante sira, Tékniku Profisionál Saúde no partisipante sira hotu.
Reportajen : Nelfiano
Foto : Nelfiano