Dili, 19 Fevereiru 2025 (Média Democracia) – Organizasaun Noun Governamental Core Group Transparancy Timor Leste (CGT-TL), realiza atividade Diálogu Nasionál kona-ba Mudança Climática hamutuk ho Autoridade Nasionál Lisensiamentu Ambientál, Institutu Públiku (ANLA.IP) Autoridade Lokál nomos estudante Universitáriu sira hodi dizemina informasaun kona-ba mudansa klimátika no finansiamentu klimátika iha Timor-Leste.
Iha abertura ne’e reprezentante Prezidente Autoridade Nasionál Lisensiamentu Ambientál, Institutu Públiku (ANLA.IP), Diretor Unidade Fiskalizasaun Ambiental (UFA), ANLA.IP, Norberto M. de Araújo hateten, momentu ohin ne’e importante tebes ba ANLA.IP hodi ko’alia kona-ba isu globál mudansa klimátika ne’ebé mundu infenta inklui Timor-Leste.
“Mudansa klimátika nian ne’e la’os iha Timor-Leste de’it mak infrenta maibé iha mundu tomak mós infrenfa ba situasaun ne’e nomos fokus importante ida ba ita hotu, tanba ne’e liuhusi workshop ida refere, mai ita hamutuk hodi halo diskusaun ne’ebé kle’an hodi nune’e ita hotu bele buka solusaun oinsá halo mitigasaun ba iha isu mudansa klimátika ida ne’e.” Dehan reprezentante Prezidente ANLA.IP, Norbertu de Araújo iha Salaun Tower Fatuhada Dili, Kuarta ne’e
Nia espera katak liuhusi diskusaun ne’e bele sai hanesan bukae ba partisipante hotu, tanba ne’e nia husu ba partisipante sira atu halo diskusaun kle’an hodi sai solusaun no mitigasaun ba mudansa klimátika.
Iha biban ne’e Koordenadór Nasionál organizasaun noun governamental Core Group Transparancy Timor-Leate (CGT-TL), Jemicarter Moniz dos Reis hateten, enkontru ba ohin loron ne’e atu dezimina informasaun ba mudansa klimátika ba autoridade lokál sira nomos estudante universitáriu tanba dala barak sira ladún hatene kona-ba asuntu refere.
“Tanba dala barak ita-nia komunidade sira no Autoridade sira rona de’it maibé sira la hatene saida mak mudansa klimátika no saida mak finansiamentu klimátika, entaun liuhusi worshop ne’e liuliu oradór sira atu fahe informasaun kona-ba mudansa klimátika nomos ho cop 29 ne’ebé hala’o ona iha Ajar viser.” Dehan Koordenadór CGT-TL ba jornalista sira Kuarta ne’e
Nia salienta katak nu’udar sosiedads sivíl nia papél importante tebes ba asuntu mudansa klimátika tanba kauza husi ema umanu nia atitude nomos kauza husi natureza.
“Ita hatene katak asaun umanu ema-nian, ida fali mak natureza tanba natureza ita la hatene nia atu akontese bainhira, entaun ba ita umanu mak bainhira ita estraga ambiente sira liuliu sunu rai, entaun nia hamosu ona mudansa klimátika ne’ebé bele aumenta nia emisaun.” Nia salienta
Tanba ne’e presiza haree ba asuntu ne’e, dala barak akontese entaun presiza fahe informasaun ba ita-nia autoridade lokál, komunidade nomos estudante sira atu nune’e bele intende hodi prátika iha moris loron-loron.
CGT Timor-Leste nafatin esforsu servisu hamutuk ho governu atu bele tau matan nafatin ba asuntu mudansa klimátika, liuliu kona-ba finansiamentu klimátika tanba ita haree katak ajénsia international sira sempre tau osan mai iha Timor ne’e boot la halimar, liuliu finansiamentu klimátika nian.
Nia informa katak hanesan sosiedade sivíl nafatin halo tracking no monitoring ba orsamentu sira, serake orsamentu hirak ne’e uza ba atividade finansiamentu mudansa klimátikaka lae? Tanba dala barak iha relatóriu hato’o katak osan finansiamentu klimátika nia benefísiu ba povu sira, maibé dala barak tracking komunidade sira la hetan benefísiu ba ida ne’e.
Nia afirma katak fundu ne’ebé CGT hetan ne’e suporta husi Oxfam Timor-Leste, nia montante depende ba planu no programa husi ONG ne’e rasik.
“Fundus ne’ebé ami hetan ne’e suporta husi Oxfam iha Timor-Leste ne’ebé apoiu ami durante ne’e, kada tinan depende ba ami-nia planu, programa ne’ebé hato’o dalaruma bele aumenta no hamenus ha’u labele hatene nia montante hira mais depende ba planu programa ne’ebé ami iha.” Nia informa
Tuir loloos CGT iha korpu transparánsia, nia prinsipál mak tau matan ba orsamentu jerál nomos konta ba sosial transparante ninian, entaun CGT iha programa “open the book” atu haree kona-ba asuntu ema ho defisiénsia, liuliu analiza orsamentu jerál sira-nia benefísiu ba ema ho defisiénsia ka lae, liga mós ho planu asaun nasionál kada Ministériu ida-idak nian, ida seluk mak finansiamentu klimátika, finansiamentu klimátika mós hanesan atu haree kona-ba mudansa klimátika no halo tracking ba iha finansiamentu klimátika ne’e rasik.
Iha fatin hanesan Xefe Suco Seloi Malere António dos Santos Loco hateten, nu’udar lideransa komunitáriu ne’ebé besik liu komunidade sira, ita preokupa tebes ho asuntu refere, para nune’e ita hamutuk halo advokasia hodi haree kondisaun sira liliu ba mudansa klimátika ne’e labele fó problema ba ita-nia sosiedade sira.
“Liuhusi mini workshop ida ne’ebé ohin realiza, ha’u hanoin lideransa komunitáriu sira bele marka prezensa, aleinde mós grupu kamada hotu ne’ebé oras ne’e servisu makás ba mudansa klimátika nian, ne’e lisaun ida importante loos, ha’u bele konsidera nu’udar pontu de partilla ida ba ami-nia lideransa komunitáriu sira atu bele foti no enfaze ruma husi asuntu refere hodi haree ba asuntu sira liga ho Lisensa ambientál nian iha ami-nia suku no ami-nia aldeia.” Dehan Xefe Suco Seloi Malere António dos Santos Loco
Nia informa katak tanba dadaun ne’e asuntu hirak ne’e akontese hela maibé ema hotu seidauk iha koñesimentu, afinál iha kontas ida ne’e mudansa klimátika ka problema ambiente ninian, entaun mini workshop ida ne’e lisaun ida ne’ebé importante loos bele lori fila ba iha komunidade sira.
Reportajen : Estefania
Foto : Estefania