Dili, 25 Agostu 2025 (Média Democracia) – Sekretariu Estadu Formasaun Profisional no Emprego SEFOPE liuhusi Diresaun Nasional Empregu Estrajeiru hala’o serimonia lansamentu PLMSP Scale-up hodi garantia formasaun abilidade ba traballador sira. Serimonia lansamentu ne’e hala’o iha suai room Timor Plaza, sexta feira semana ne’e.
Iha entrevista ho Sekretariu Estado Formação Profisional Emprego SEFOPE, Rogerio Araujo Mendonça hateten, ohin serimonia lansamento ba iha projetu Pacific Australia Labour Mobility (PLMSP scale-up) ne’ebé iha Timor-Leste hodi apoiu programa balun iha pasific Australia labour mobility, ida ne’e oinsa atu kapasita abilidade ba joven sira liuhusi formasaun atu nune’e bele hasae sira nia koñesimentu iha area servisu husi projetu ne’e rasik.
“Husi lansamentu PLMSP scale-up ida ne’e atu dehan ba ita hotu katak projeitu refere importante tebes hodi bele dezenvolve ita-nia abilidade no kompetensia ba ita-nia traballador sira ne’ebé prepara-an atu ba hala’o servisu iha rai liur, hanesan ita hotu asiste kada tinan ita sempre haruka ita-nia joven sira ba servisu iha Australia no Korea, sira ba ho abilidade no kompetensia ne’ebé menus tebes, entaun husi lansamentu ne’e atu bele fasilita no hasae sira-nia kompetensia no abilidade skill servisu nomos lingua antes haruka sira ba servisu iha rai liur.” Dehan Sekretariu Estadu Formasaun Profisional no Emprego Rogerio Araujo Mendonça
Nia hatutan, kada tinan estadu sempre haruka joven Timoroan sira ba servisu iha area sira hanesan hortikultura nomos agrikultura, Aleinde lansamentu ohin ne’e joven sira sei priense mós vaga servisu ba iha Australia no Korea iha area hanesan Koa naan, Hein ferik katuas, Hein labarik kikoan sira, Hotelaria, no balun bele priense iha kulinaria nomos iha merkadu Australia nian, tanba husi formasaun ne’e hasa’e ona sira-nia koñesimentu no abilidade ba iha servisu nian.
“Ha’u atu dehan katak, lansamentu ne’e fó vantajen boot tebes ba ita, tanba bele fasilita ona ita nia joven sira atu bele ba servisu iha area oioin, tanba sira-nia skill servisu ne’e ita aumenta ona. Entaun bainhira governu haruka sira ba servisu iha rai liur, sira bele implementa skill ne’ebé sira aprende ona iha formasaun refere.” Hatutan Sekretariu Estadu Formasaun Profisional no Emprego
Nia informa, haree ba preparasaun joven Timoroan ne’ebé atu ba servisu iha hotelaria ne’e agora daudaun governu servisu hamutuk hela ho parseria sira hanesan Instituisaun Regulador Sentru formasaun.
“Ita ohin rona husi Embaixador Australia iha Timor dehan, merkadu Australia ne’e presiza traballador ida ne’ebé mai ho kualidade as tebes, entaun ita tenke reforsa iha Sentru Formasaun sira atu bele fasilita sira, liuliu ita tenke reforsa iha formador sira ne’ebé prepara materia hodi fó formasaun ba iha ita-nia joven feto no mane sira, nune’e sira ne’ebé priense ba servisu merkadu ho kualidade ne’ebé as tuir merkadu Australia sira presiza.” Informa Sekretariu Estadu Formasaun Profisional no Emprego Rogerio Araujo Mendonça
Nia reafirma, atividade lansamentu ne’e hetan partisipa mós husi kompaña Australia sira ne’ebé mai ho profisaun halo rekrutamentu ba iha servisu ida koa naan nian no kulinaria,
Iha fatin hanesan reprezentante Governu Australia iha Timor Caitlin Wilson hateten, Agradese ba oportunidade ne’ebé fó ona mai, hanesan reprezentante Embaixada Australia iha Timor atu hato’o diskursu badak ba iha atividade lansamentu ofisial ba iha PLMSP scale-up hodi hasae abilidade servisu nomos oinsa atu fasilita traballador sira-nia koñesimentu ne’ebé di’ak iha area servisu nian.
“Ha’u agradese tebes atu haree oportunidade sira iha PLMSP scale-up ne’ebé sei promete buras iha Timor-Leste, inklui investimentu no ambisaun ne’ebé hato’o husi ita-nia Primeiru Ministru iha fulan dezembru, entaun ohin ita hotu asiste katak espresaun sira husi investimentu ne’ebé to’o ona mai ohin loron maka ita lansa projetu PLMSP scale-up, ida ne’e husi ita sira servisu koletiva.” Dehan Reprezentante Governu Australia iha Timor Caitlin Wilson
Nia informa, bainhira koalia kona-ba atividade sira ne’e tenke iha uluk abilidade servisu ne’ebé di’ak. bainhira sira iha ona abilidade servisu di’ak no koñesimentu ne’ebé forte maka sira sei hetan benifisiu hodi sustenta/apoiu ekonomia familia.
“Nune’e nafatin husu ba joven sira tuir formasaun sira ne’ebé fasilita ona husi ita nia Instituisaun ne’ebé parseria ona ho Governu Timor atu nune’e bele ba servisu iha projetu PLMSP scale-up Australia, ne’ebé oferese servisu oioin.” Infroma Reprezentante Governu Australia iha Timor Caitlin Wilson
Husi oportunidade ida ne’e hakarak dehan, esforsu ne’ebe imi hala’o ne’e sei fó benifisiu ba familia no haburas ekonomin Timor-Leste.
Esplika kle’an liután, iha serimonia lansamentu PLMSP scale-up partisipa masimu husi SEFOPE nomos parseria sira hanesan, Diretor jeral formasaun profisional no empregu, Reprezentante Embaixada Australia iha Timor-Leste, CALTECH, CANEX, GTNT, MINTRAC, SIMILIE ACADEMY, LELI, CARE TL, WORD VISION TL, THE ASIA FOUNDATION INCANTO inklui mós formado no formadores sira husi incanto ho jornalista sira.
Reportajen : Domingas
Foto: Domingas