Dili, 10 Outubru 2025 (Média Democracia) – Ministru Justisa hamutuk ho organizasaun Internasionál Migrasaun (sigla inglés IOM) hala’o lansamentu ba iha website Komisaun Luta Anti-Tráfiku Umanu ho objetivu hodi reforsa servisu Komisaun Luta Anti-Tráfiku Umanu liuhusi fahe informasaun atu nune’e bele kombate krime tráfiku umanu iha nasaun Timor-Leste. Serimonia lansamentu ne’e hala’o iha kinta feira semana ne’e.
Iha entrevista Ministru Justisa Sergio Hornai hateten, ohin governu liuhusi Ministeriu Justisa servisu hamutuk ho organizasaun Internasionál Migrasaun (sigla inglés IOM) hodi lansa website ne’e nu’udar forma ida komprimisiu Governu nian tuir programa nonu-Governu nian ne’ebé atu hakbi’it instituisaun Estadu liuliu ba polítika dijitalizasaun nian.
“Lansamentu ida ohin ne’e hanesan komprimisiu Governu nian depois komisaun ne’e estabelese sira tenta haree katak dijitalizasaun hanesan forma ida oinsá atu bele introdús sira-nia hanoin hotu iha sistema ne’e liliu iha desizaun ne’ebé Estadu foti ba komisaun ne’e bele iha website hodi nune’e komunidade bele akompaña no bele hato’o mós sira nia hanoin ruma ba servisu ne’ebé komisaun tráfiku umanu Hala’o.” Dehan Ministru justisa Sergio Hornai
Nia hatutan, Komisaun Luta Anti-Tráfiku Umanu hanesan entidade barak mak hola parte iha laran, Ministeriu Justisa, PCIC, Diresaun Nasionál Servisu Investigsaun Kriminál, Servisu Migrasaun, Ministeriu Públiku no Sosiedade Sivil.
“Website ida ne’e fasilita liután Komisaun Lut Kontra Tráfiku Umanu hodi bele divulga informasaun sira ba komunidade liuliu oinsá prevene krime tráfigu umanu, liuhusi website ida ne’e mós komunidade sira bele fahe informasaun no koñesimentu kona-ba aktu sira ne’ebé liga ba tráfiku umanu.” Hatutan Ministru Justisa
Nia esklarese, liuhusi website ne’e komunidade sira bele iha kontaktu ho komisaun kona-ba iregularidade ne’ebé mosu, nune’e entidade investigasaun kriminál bele halo nia servisu.
“Durante ne’e Komisaun Luta Kontra Tráfiku Umanu tutela iha Ministeriu Justisa no halo ona servisu sosializasaun ba aldeia, suku, Postu to’o nivél munisipiu hodi husu ba komunidade prevene krime tráfiku umanu iha Timor-Leste. Krime tráfiku umanu ne’e krime ne’ebé laiha ona fronteira, ho estabelesimentu webiste ne’e bele tulu komisaun halo nia servisu ho di’ak.” Esklarese Ministru Justisa Sergio Hornai
Ministru Justisa husu ba entidade hotu-hotu ne’ebé iha Timor-Leste, komunidade sira, karik mosu krime trafiku umanu iha teritoriu nasionál ka fora husi juridisaun Timor-Leste ita hamutuk preve krime ne’e. ho lansamentu website ida ne’e hatudu katak governu iha seriadade no komprimisiu forte atu kombate krime tráfiku umanu iha Timor-Leste.
Esplika kle’an liután iha serimonia lansamentu ba website Komisaun Luta Anti-Tráfiku Umanu partisipa husi Ministru Justisa hamutuk ho organizasaun Internasionál Migrasaun (sigla inglés IOM), Diretór Servisu Investigasaun Kriminál Vicente Fernades e Brito, Sekretaria Estadu Igualidade, Xefe Organizasaun Internasional, Reprezentante Ajensia Teknologia no Komunikasaun TIK, reprezentante Ministeriu Transporte Telekomunikasaun, Diretor Nasional PCIC, Diretor Jeral Administrasaun, Reprezentante sira husi Embaixador Australia, Indonezia, TLPDP, Komisariu sira, inklui sosiedade sivil.
Reportajen : Domingas
Foto : Media MJ