Manatutu, 19 Novembru 2025 (Média Democracia) – Reprezenta Prezidénsia Repúblika, Jenerál (Reformadu) Lere Anan Timur, Asesór Polítiku Prinsipál ba Prezidente Repúblika, J. Ramos-Horta, iha tersa-feira ne’e hato’o diskursu ida ne’ebé forte no emosionál durante serimónia funerál dedika ba veteranu sira-nia restu mortais iha Manatutu. Informasaun ne’e Média Democracia asesu husi pajina Prezidente da Republika, Kuarta semana ne’e.
Lere Anan Timur fó omenajen ba kombatente sira ne’ebé fó sira-nia vida ba independénsia nasaun nian, subliña katak eroi loloos maka sira ne’ebé mate durante luta.
“Ita sira ne’ebé sei moris la’os eroi, eroi mak sira ne’ebé mate ona ba ita-nia liberdade.” Dehan Reprezentante Prezidente da Repúblika Jeneral Reformadu, Lere Anan Timur
Lere Anan Timur hatutan, Estadu nia devér solene ida atu asegura katak eroi sira ne’e simu dignidade no onra ba, ne’ebé sira merese ba sira-nia sakrifisiu. Subliña mós terus naruk ne’ebé família sira hasoru, hanoin fila-fali sira-nia matan-been wainhira sira simu bandeira nasionál nu’udar símbolu ida husi sira-nia lakon ba ente keridu sira.
“Fó hanoin ba ema hotu katak independénsia Timor-Leste nian la’os prezente ida, maibé hetan husi sosa ho raan ho isin. Partikularmente ba jerasaun foun sira, husu ba sira atu koñese no rai didi’ak istória husi luta ba soberania no harii futuru ida ne’ebé onra sakrifisiu sira husi jerasaun tuan, hodi garante katak liberdade ne’ebé nasaun hetan ho susar ne’e sei la sai hanesan buat baibain de’it.” Hatutan Lere Anan Timur
Reformadu Jenerál afirma, apela ba kura nasionál no prosesu rekonsiliasaun ne’ebé kontínua, Husu ba sidadaun hotu atu iha koñesimentu kona-ba fatin restu mortál kombatente sira ne’ebé seidauk hetan, atu labele tauk fó hatene, nune’e bele permite kada eroi ida bele hakoi ho dignu.
Esplika liután, partisipante iha sermonia ne’e Adjunta Xefe Kaza Sivil Prezidénsia Repúblika, hatudu aktu ida ne’e nu’udar dever nasionál no sagradu, importante tebes atu taka kapítulu ida ne’ebé nakonu ho terus iha nasaun nia istória no hametin fundasaun unidade nasionál nian.
Reportajen : Nelfiano
Foto : Media PR