Ainaro, 22 Jullu 2025 (Média Democracia) – Lideransa Komunitariu husi Suku Fatubessi, Postu-Administrativu Maubisse, Munisipiu Ainaro, Apresia Programa Institutu Nasional Kombate HIV-SIDA bele Partilla Informasaun iha area remotas sira.
Tuir Autoridade Lokal Suku Fatubessi, Bonifacio Pereira Mendonça hateten, senti orgullu tebes tanba informasaun ne’e importante ba komunidade sira iha área remotas, no ita hatene katak komunidade sira iha area remotas la asesu ba informasaun kona-ba moras HIV-SIDA.
“Informasaun sira ne’e importante tebes liuliu ba moras HIV-SIDA, tanba nasaun Timor-Leste moras ne’e aumenta ba bebeik, no ita haree liuhusi sensibilizasaun Institutu Nasional Kombate HIV-SIDA nian hatudu katak territoriu Timor-Leste ne’e Rihun ruanulu resin ona mak afeta ba moras refese.” Dehan Autoridade Lokal Suku Fatubessi, Bonifacio Pereira Mendonça
Parte seluk tuir reprezentante Administrador Postu-Administrativu Maubessi Helder de Orleans Soares dehan, Ita hotu hatene katak komunidade sira iha area remotas durante ne’e akompaña deit iha media sosial kona-ba oinsa halo prevensaun ba moras refere, nune’e ohin loron agradese boot tanba INSCIDA bele mai partilla direita iha area remotas.
“Husu ba komunidade sira ne’ebé partisipa iha programa INSCIDA nian ne’e karik bele partilla tutan informasaun ne’e ba sira seluk ne’ebé la marka prezensa iha momentu ne’e. no agradese ba komunidade, alin, no Autoridade Lokal sira ne’ebé ohin mai partisipa masimu iha sensibilizasaun refere.” Dehan Reprezentante Administrador Postu-Administrativu Maubisse Munisipiu Ainaro
Nia husu ba joven sira tantu feto no mane kuidadu ita-nia-an nune’e ita nia saude bele di’ak, ho moto ida katak saude iha ita-nia liman rasik. tanba hanesan joven tenke kria dezenvolvimentu nasaun liuhusi kuidadu-an no hases-an husi risku sira hanesan droga nomos moras HIV-SIDA, nune’e bele kompete ba vaga PNTL nian.
Nia esplika liután katak, nu’udar Lideransa Komunitariu kontente tebes, tanba bele mai fahe informasaun iha suku ida ne’e. Informasaun sira ne’e hotu sei kontinua partilla fila-fali ba komunidade, inan aman no foinsa’e sira, ne’ebé ohin la partisipa iha formsaun refere.
Reportajen : Tomas
Foto : Tomas