Dili 19 Agostu 2025 (Média Democracia) – Ministeriu Administrasaun Estatal hamutuk ho reprezentante Igreja Katólika, vizita altar santu Tasi-Tolu. Vizita ida ne’e halo parte iha preparasaun ba Misa solene sei selebra iha loron 10 Setembru 2025, hodi marka aniversáriu tinan ida nian, Vizita Apostólika husi Maktoban Sua Santidade Papa Francisco nian mai Timor-Leste, atividade vizita altar santu ne’e Media Democracia asesu liuhusi Pajina MAE Tersa-feira semana ne’e
Prezidente Ezekutivu Komisaun Nasionál Juventude Katólika Timor-Leste (CNJCTL), Pe. Francisco Indra do Nascimento Tey-Seran, hatete preparasaun sira hala’o daudaun husi CNJCTL ho orientasaun no konfiansa husi Sua Eminénsia Kardeál no Bispu sira, atu halibur foinsa’e sira husi dioseze tolu hanesan Dili, Baucau nomos Maliana atu mai partisipa iha serimónia aniversáriu vizita tinan ida husi Sua Santidade Papa Francisco nian.
“Iha loron 9 Setembru 2925, Tasi-tolu sei loke ba foin-sa’e sira no peregrinu sira atu mai konsentra ka halibur malu iha fatin misa nian. Iha kalan sei iha konsertu espirituál no vijília kalan orasaun nian hamutuk ho Sua Eminénsia Kardeál. No iha loron 10 Setembru, sei hahú ho Laudes (Orasaun dadeer) iha tuku 6:00 dadeer, tuir fali iha tuku 7:00 dadeer, sei selebra Santa Misa ne’ebé prezide husi Sua Eminénsia Kardeál, hodi marka komemorasaun ofisiál Vizita Apostólika Sua Santidade Papa nian.” Dehan Prezidente Ezekutivu Komisaun Nasionál Juventude Katólika Timor-Leste (CNJCTL) Pe. Francisco Indra do Nascimento Tey-Seran
Pe. Francisco hatutan tantu vijília no Misa nakloke ba públiku, sei laiha restrisaun ba partisipasaun no ema hotu bele hamutuk iha orasaun no agradesimentu. Peregrinu sira husi dioseze tolu, hein katak sei mai konsentra hotu iha Tasi-Tolu, akompaña husi grupu foin-sa’e sira no ekipa liturzia sira “Selebrasaun ida ne’e ba ema hotu, liu-liu ba joven sira.
Esplika liutan vizita preparativu ba Altar Santo Tasi-Tolu marka prezensa husi Amu Pároku Balide. Komisáriu Ezekutivu ba Servisu Korporativu EDTL, E.p. Xefe Gabinete Ministru Administrasaun Estatál nomos Sekretáriu Administrasaun Munisípiu Dili, ADN no Diretór Nasionál Ministériu Administrasaun Estatál nian.
Reportajen : Nelfiano
Foto : Media MAE