Dili, 26 Fevereiru 2026 (Média Democracia) – Mahon Alternativu Bobonaru Oan-MABO realiza komunikadu imprénsa hodi husu ba Governu atu tau-matan no normaliza estrada Postu Maliana liga ba Postu Lolotoe, tanba durante tinan barak nia laran ona povu Bobonaru nafatin sofre atu asesu ba merkadu ho di’ak.
Porta-voz MABO, Cristiano Santos hateten, Munisípiu Bobonaro jeografikamente fronteira ho Indonesia ho nia área 1.380.90 Km² totál populasaun 132.547, kompostu husi mane 66,815 no feto 65,732, iha nia posto administrativo (6) hanesan, Atabae. Balibo, Bobonaro, Cailaco, Lolotoe no Maliana. Populasaun moris nu’udar agrikultór, hanesan halo natar, toos nomos hakiak animal atu sustenta sira-nia ekonomia familia.
“Setór agrikultura, Munisipiu Bobonaro mós koñesidu ho sitiu turizmu hanesan, Marobo hot spring ka bee manas Marobo, foho ass Loelaku no seluk tan. Tanba ne’e estadu tenki tau atensaun hodi dezenvolve infreastutura bázika sira, nune’e bele atrai turista sira hodi kontribui ba ekonómia nasional.” Dehan Porta-voz MABO Cristiano Santos ba jornalista sira iha Jardim 5 de Maio 24/02/2026
Porta-voz informa, hafoin restaurasaun independénsia tinan 24 ona, kondisaun infraestrutura hanesan estrada sai preokupasaun boot ba populasaun Munisipiu Bobonaru, liuliu postu Bobonaro no Lolotoe ne’ebé difikulta tebes komunidade sira, hodi transporta sira nia produtu ba iha merkadu. La’os ne’e de’it, difikulta mós prosesu transportasaun pasiánte sira husí sentru saúde Bobonaru no Lolotoe ba ospitál refereal Maliana.
“Kondisaun hirak ne’e ami Mahon Alternativu Bobonaru Oan-MABO, hola papel nu’udar movimentu estudantil ne’ebé reprezenta povu Munisipiu Bobonaro, ezize no husu ba Nonu-Governu liuhusi Ministru Obras Públika atu aselera prosesu rehablitasaun estrada husi diresaun postu Maliana ba Bobonaro no Lolotoe, tanba difikulta tebes ba komunidade sira atu halo movimentasaun liu-liu iha tempu udan.” Informa Porta-voz
Porta-voz relata, nafatin husu ba Ministru Obras Públika-MOP atu implementa polítika públikas ida-ne’ebé di’ak hodi dezenvolve infra-estrutura báziku hanesan estrada iha teritóriu Timor-Leste liu-liu postu Bobonaru no Lolotoe tanba kondisaun grave tebes.
Esplika liután Mahon Alternativu Bobonaru oan-MABO, realiza komunikadu imprensa hodi husu parte relevante sira atu resposta imediatamente ba ezizénsia sira ne’e. Bainhira laiha resposta imediatamente husi parte relevante mak Mahon Alternativu Bobonaru Oan, sei hamutuk organiza kamada sosiál hotu-hotu no komunidade husi postu Bobonaru no Lolotoe atu labele fiar tan, partidu hotu-hotu neʼebé durante ne’e kaer ukun no labele tuir tan eleisaun presidensial no parlamentár.
Reportajen : Nelfiano
Foto : Nelfiano