Dili 03 Outubru 2024 (Media Democracia) – Ministeriu da Administrasaun Estatal hala’o serimonia tomada posse ba Administradór Postu Administrativu Laclo no Laclubar autoridade Munisipal Manatutu ho tema ” Implisionar a descentralização para promover a coesão territorial.” Serimonia tomada de posse ne’e hala’o iha salaun VIP MAE.
Iha entrevista ho Administradór Postu Administrativu Laclo Filomeno Rodrigues Pereira Carceres hateten, primeiru hato’o agradese ba parte hotu nomos ba governu atu dehan katak atividade ohin ne’e hanesan serimonia tomada posse ne’ebé importante tebes ba sira nain rua hetan fiar husi ministeriu atu bele ukun iha Postu Administrativu Laclo no Laclubar.
“Onra boot ida ba ha’u hodi hetan fiar ida ne’e, atu asume responsabilidade hodi hala’o servisu iha baze ne’ebé liubá iha komunidade sira hela iha areas rurais nomos remotas, nune’e atu servisu hamutuk hodi identifika problema saida mak komunidade sira hasoru iha fatin ne’ebé sira hela ba nomos tau prioridade liu dezenvolventu iha fatin ne’ebé sira hela ba atu nune’e bele hamenus problema sira hasoru iha sira nian moris lorloron.” Lia hirak ne’e hato’o husi Administrador Postu Administrativu Laclo Filomeno Rodrigues Pereira Carceres
Nia hatutan esperansa ba oin sei servisu di’ak liu ho komunidade sira no sei koopera servisu hamutuk ho autoridade lokal sira hodi hare’e ba iha problema ne’ebé komunidade sira hasoru atu nune’e bele hadia problema sira ne’ebé komunidade enfrenta no hamosu dezenvolve diak liu iha futuru.
Iha sorin seluk hatutan husi Ministeriu Administrasaun Estatal Tomas Do Rosario Cabral hateten, ohin ita mai partisipa iha atividade sonela ida ne’ebé ministeriu fó fiar ba iha administradór nain ne’ebé sei ukun iha Postu Administrativu Laclo no Laclubar iha Munisipiu Manatutu entaun atividade ohin ne’e importante tebes ba ita hotu
“Lori governu nia naran husu ba Administradór nain rua ne’ebé ohin foin simu posse ne’e atu fila fali ba Munisipiu atu servisu hamutuk ho komunidade sira hodi buka tuir problema ne’ebé sempre mosu iha komunidade nia leet nomos hodi servi povu ho imi nia fuan, nune’e povu bele moris ho diak.” Dehan Tomas Do Rosario Cabral
Nia hatutan hatutan husi ohin ba oin ita-boot nain rua iha ona responsabilidade boot atu servi povu sira iha imi nia Munisipiu rasik ba servisu ho komunidade sira atu nune’e bele hamenus problema basiku sira ne’ebé komunidade sira hasoru no imi nain mós hala’o observasaun direta. tan ne’e husu ba Administrador nain rua atu servisu ho seriedade hodi hadia Munisipiu Manatutu liuliu Postu Laclo no Laclubar.
Rekomendasaun husi Ministeriu Administrasaun Estatal ba Administradór nain rua atu fila ba Munisipiu hodi servisu ho seriedade hodi hadia munisipiu nomos sosiedade sira nia moris tanba dezenvolvimento sei la lao bainhira Administradór ida servisu la ho seriedade, tan ne’e husu ba Administrador Postu Administrativu nain rua atu bele servisu hamutuk ho autoridade lokal sira nomos komunidade sira iha areas rurais no remotas
Reportajen : Domingas
Foto : Domingas