Dili, 15 Janeiru 2026 (Média Democracia) – IX Governu Konstitusionál liuhusi Ministériu bá Asuntus Kombatentes Libertasaun Nasionál (MAKLN), hamutuk ho Conselho dos Combatentes da Libertação Nacional (CCLN) abertura Pagamentu Pensaun Veteranus Faze da-huluk nian ba Kombatente sira hamutuk (15.697) iha MAKLN Comoro Dili hahú husi loron 15 Fulan-Dezembru tinan 2025.
Ministru Asuntus Kombatentes Libertasaun Nasionál MAKLN Gil da Costa Monteiro “Oan Soru” hateten, atu atualiza informasaun katak fixa pagamentu nian ne’ebé Tékniku DNPS (Diresaun Nasionál ba Pensaun no Subvensoens) atribui ona bá benefisiáriu sira, hahú husi loron 15 fulan Dezembru 2025 mai to’o loron 12 fulan Janeiru 2026, hamutuk rihun-ualu atus-ida hitunulu resin-haat (8.174), ekivále ho persentájen 52 (52%).
“Ami halo atendimentu, atribui fixa pagementu ba Kombatente sira hahú husi loron 15 fulan Dezembro 2025, to’o horseik, loron 12 fulan Janeiro 2026, ita atribui ona fixa pagamentu ba ema rihun ualu, atus-ida hitunulu resin-haat (8.174). Ami tribui fixa ida ne’e signifika kombatentes sira lori fixa ida-ne’e ba iha ne’ebá, hatudu ba Banku, banku prosesu kedas ona pagamentu ba nia, tanba sira ida-idak namkari iha banku komersial sira ne’ebé sira hotu-hotu pertense.” Dehan Ministru Asuntu Kombatentes Libertasaun Nasionál MAKLN Gil da Costa Monteiro “Oan Soru”
Ministru hatutan, haree kona-ba porsentu Munisípiu nian husi totál 8.679 ne’e, 403 (66%) husi Munisípiu Aileu, 681 (68%) husi Munisípiu Ainaro, 6 (86%) husi Munisípiu Ataúro, 392 (46%) husi Munisípiu Baucau, 664 (58%) husi Munisípiu Bobonaro, 798 (71%) husi Munisípiu Covalima, 2.741 (70%) husi Munisípiu Dili, 837 (90%) husi Munisípiu Ermera, 761 (26%) husi Munisípiu Lautem, 384 (30%) husi Munisípiu Liquiça, 209 (31%) husi Munisípiu Manatutu, 132 (27%) husi Munisípiu Manufahi, 11 (22%) husi Oecusse, 136 (21%) husi Munisípiu Viqueque, 19 (35%).
“Iha Munisípiu hotu-hotu ne’ebé seidauk konklui. Munisípiu ne’e rasik nia bele mai keta-ketak, maibé nia mai ema nain hira ita tenke atende. Aleinde mai kahur malu mós ita tenke atende nafatin. Ita mós separa por Munisípiu maibé dalaruma nia mai iha loron ida, oráriu ida ninian ne’e, sees tiha, mai fali iha data sira seluk nian, maske nune’e ami nafatin koko natende sira to’o remata.” Hatutan Ministru Asuntu Kombatentes Libertasaun Nasionál MAKLN
Ministru afirma, bainhira Munisipiu sira ne’ebé seidauk konklui hotu sira mós bele mai, maske iha loron ida kombatentes sira mai ho Munisípiu diferente no la tuir orariu ekipa, maibé MAKLN nafatin atende nune’e servisu ne’e bele remata.
Esplika liután benefisiáriu sira ne’ebé dadauk ne’e forma hela atu foti pagamentu nian no lori ba halo levantamentu osan iha banku komersial sira, mai husi Kombatente sira ne’ebé Rejístadu iha Segundu-Rejístu 2009 nian, ho totál 92.591. Iha ne’ebé 61.711 mak tama hela iha reklamasaun no kontestasaun no 30.880 mak daudauk ne’e atu hetan pagamentu husi Governu no balu simu dadauk ona.
Reportajen : Nelfiano
Foto : Media MAKLN