Dili, 15 Dezembru 2025 (Média Democracia) – Ministeriu Asuntu Kombatentes no Libertasaun Nasional (MAKLN) ohin loron dahuluk ba pagamentu ema rihun salunulu-resin-lima atus-neen sianulu-resin-hitu 15.697 ba kombatentes no familia martires sira ne’ebé rejistu ona iha 2009. Atividede ne’e hala’o iha MAKLN Comoro Dili.
Ministru Asuntu Kombatentes no Libertasaun Nasional (MAKLN), Gil da Costa Monteiro “Oan Soru” hateten, ohin loron dahuluk ba pensaun pagamentu ba veteranu hamutuk 15,697, no mosu failansu balun iha prosesu atu foti resivu pagamentu nune’e ba oin sei hadia di’ak liután.
“Ohin loron dahuluk ba prosesu pagamentu, maibé ita haree ema barak mak dudu malu no sena malu tanba ida ne’e loron dahaluk sempre failansu sira hanesan ne’e. Maibé ami sei regulariza ema ne’ebé nakonu iha ne’e labarik sira mai tula ferik katuas sira mai tama hotu iha areadores ida ne’e entaun hodi hamosu sena malu no dudu malu. Ita hatene ema ne’ebé lolos atu simu pensaun hamutuk 15.697, no tempo tuir mai ita sei hadia failansu sira ne’e.” Dehan Ministru Asuntu Kombatentes no Libertasaun Nasional (MAKLN), Gil da Costa Monteiro “Oan Soru”
Ministru Asuntu Kombatentes hatutan, iha oportunidade ne’e hato’o ba publiku katak pagamentu ba kombatentes no familia martires sira laos ba loron ohin de’it maibé sei halo pagamentu to’o iha fulan Dezembru nia laran.
“Ohin ha’u rasik konsulta ona ho Diretor baze de dadus preparadu atu atende ema 700 kada loron nune’e bele rejolve lalais ema 15.697 to’o remata.” Hatutan Ministru Asuntu Kombatentes no Libertasaun Nasional (MAKLN),
Ministru ne’e afirma, aproveita mós tempu atu fó hatene ba kombatentes no veteranus sira hotu no familia martires sira ne’ebé iha diretu atu hetan pensaun sobrevivensia, pensaun espesial de reforma no subsistensia atu mantein nafatin disiplina, nune’e Ministeriu disponivel atu fasilita to’o remata.
Iha fatin hanesan reprezentante veterana Julia de Carvalho “Kakehe” hateten, sente kontente tebes ba loron ohin nian maske mai atu simu resivu pagamentu nian ho kondisaun la di’ak maibé nafatin esforsu, nune’e bele hetan resivu hodi foti osan iha ida-idak nia Munisípiu.
“Ha’u sente kontente tebes tanba ohin loron oportunidade di’ak mai ami hotu ne’ebé durante luta ba ukun rasik-aan ba rai ida ne’e. Ohin ami barak mak mai iha fatin ida ne’e atu simu ami nia diretu maske ema barak mak dudu malu maibé nafatin matein atu hein to’o simu resivu pagamentu nian.” Dehan Reprezentante veterana, Julia de Carvalho “Kakehe”
Nia hatutan, maske hasoru situasaun atendementu ladun di’ak, tanba ema barak maibé nafatin hein nune’e bele simu resivu pagamentu tanba uluk iha 2009 submete dokumentus ne’e aat liu, tanba halai ba mai no dokumentu la kompletu maibé esforsu to’o hetan solusaun.
Reportajen : Nelfiano
Foto : Nelfiano