Dili, 18 Marsu 2025 (Média Democracia) – Ministru ba Asuntu Kombatente Libertasaun Nasional MAKLN, hala’o enkontru konvokatoriu ho komisariu sira husi Munisipiu relasiona ho dadus reklamasaun nomos kontestasaun ne’ebé agora daudaun iha ona nasional, enkontru ne’e hala’o iha salaun Tres de Marco Maubai, Edifisiu MAKLN, Comoro Dili.
Iha entrevista ho Ministru ba Asuntu Kombatente Libertasaun Nasional Jil da Costa Monteiro “Oan Soru” hateten, atu dehan ba publiku katak enkontru ida ohin atu halo avaliasaun ruma kona-ba loron neennulu (60) ba simu reklamasaun ho kontestasaun sira ne’ebé haruka mai husi Munisipiu hotu-hotu no haree mós ba iha formas oinsa tanba durante ne’e akompana hela iha parte balun ninian dokumentu seidauk mai hotu entaun MAKLN sei haree hela no seidauk halo desizaun final ida atu fó sai ba publiku kona-ba extensaun tempu oituan tan, tanba bazeia ba lei
“Lei laos deit iha artigu 18 ne’ebé baibain ha’u fó sai maibe iha lei seluk ne’ebé hateten katak Governu iha kompetensia atu halo desizaun ruma relasaun ho atividade sira ne’ebé relasiona ho dokumentu balun, nune’e Governu presiza deside.” Lia-hirak ne’e hato’o husi Ministru ba Asuntu Kombatentes no Libertasaun Nasional Jil da Costa “oan soru”
Nia salienta hanesan Ministru ho Sekretariadu Estadu labele deside deit maibé tenke konvoka iha reuniaun ida ho Administrasaun CCLN, Prezidente ho Vise-Prezidente sira atu nune’e iha reiuniaun ida bele hetan desizaun ida hodi fó prolongamentu ba dadus hirak ne’e.
“Ami mós haree hela kona-ba dadus pendente sira ne’ebé hahu husi tinan 2003 to’o 2005 ninian, ami koko hakarak aruma hamutuk dala ida atu nune’e bele fó mós solusaun ba iha dadus pendente sira ne’e, tanba dadus ne’e kleur tebes no iha tempu liubá kotuk reklamasaun, kontestasaun sira ne’e la iha prazu ida, la iha limitasaun ida, no agora daudaun enkontru ohin ami koko atu tau hamutuk hodi buka solusaun tuir regra no artigu ne’ebé iha ona ho nune’e bele informa ka fó sai ba publiku.” Dehan Ministro Jil da Costa “oan soru”
Nia salienta enkontru ohin ne’e ho komisariu sira mai husi Munisipiu hirak ne’e, no atu tau hamutuk ideia nomos rona ideia husi sira hodi buka solusaun hamutuk haree ba dadus reklamasaun no kontestasaun ne’ebé agora daudaun tama ona iha nasional.
Reportajen : Domingas
Foto : Domingas