Dili, 14 Janeiru 2026 (Media Democracia) – Ministeriu ba Asuntus Kombatentes Libertasaun Nasionál (MAKLN), realiza konferensia imprensa hodi informa kona-ba martir sira ne’ebé Mate iha Funu laran ho identidade klosan hahú husi tinan 1975-1999 ne’ebé rejistadu iha Sistema baze-dadus Diresaun Nasionál ba Pensaun no Subvensoens (DNPS) hamutuk ema na’in (797). Konferensia refere hala’o iha Salaun MAKLN Comoro.
Ministru Asuntu Kombatentes Libertasaun Nasionál MAKLN Gil da Costa Monteiro “Oan Soru” hateten, Martires sira-nia pensaun, sei simu husi família sira hanesan maun-alin ka Inan-Aman rasik. Banhira família sira ne’ebé reprezenta atu foti Martir nia pensaun, tenke aprezenta dokumentu komprovativu ba Tékniku DNPS hodi foti fixa pagamentu hafoin ba halo levamentu osan iha banku sira ho valór rihun-sanulu dolár Amerikanu ($10.000).
“Atribuisaun rihun $10 ba kada Martir ne’e bazeia ba Dekretu-Lei Númeru 35/2025, loron 15 Fulan Outubru, ne’ebé kona-ba “Apoiu Finanseiru Uniku ba Família Martir sira Libertasaun Nasionál nian. Daudaun ne’e MAKLN rejista ona ema na’in 797, maibé to’o oras ne’e seidauk iha família ruma mak ba rekere iha CCLN no MAKLN katak, loos duni, Martir ida ho identidade hanesan ne’e, sira iha relasaun família Maun-Alin, ka Inan-Aman rasik.” Dehan Ministru Asuntu Kombatentes Libertasaun Nasionál MAKLN
Ministru relata Martir Mate-klosan ne’ebé atu atribui finanseiru úniku, iha dadus ne’ebé iha hamutuk ema 797, maibé husi sira ne’e familia ida seidauk mai rekere. Bainhira familia sira mai ona MAKLN sei atribui sira-nia diretu pensaun pagamentu nian.
“Dadus kona-ba lísta ne’e hanesan dadus ativu hela, maibé to’o agora ema ida la mai halo kontesta, ema ida la halo protestu hasoru katak, nia ne’e la’os Mártires, ne’e dadus arkivu, no númeru iha base de dados maka 797. Husu ba família sira ne’ebé atu foti Martir nia pensaun, tenke aprezenta dokumentu ba parte Tékniku nian tanba ema hotu-hotu tenke liuhusi prova tuir dekretu lei.” Relata Ministru MAKLN
Ministru mós afirma, razaun tenke aprezenta dokumentu sira tanba iha prosesu ne’ebé daudauk ne’e lao, ema balu ba to’o iha Tékniku sira nia oin, maibé bainhira husu sira-nia Avo nia naran sira la hatene, entaun parte tekniku haruka fila. Depois tempu seluk mak buka malu hodi hadia tanba Timor kloot hela presiza mak ema hotu-hotu nia kontribuisaun, nune’e bele deskobre buat.
Esplika liután prinsipalmente maun-alin sira ne’ebé mai tenke lori dokumentus ne’ebé loos tanba dadus MAKLN nian iha hela. Prontu familia sira mai tenke lori dokumentu, nune’e prova duni katak maun-alin ka Inan-Aman rasik kalae. Hafoin ita bele halo pagamentu ba sira-nia diretu, maibé fiar katak dokumentu ba Martir sira familia prepara hotu ona hein de’it atu mai halo pagamentu.
Reportajen : Nelfiano
Foto : Media MAKLN