Dili, 18 Marsu 2025 (Média Democracia) – Ministru bá Asuntus Kombatentes bá Libertasaun Nasionál (MAKLN) Gil da Costa Monteiro “Oan-soru” hateten durante Fulan hirak nia laran MAKLN regista dadus reklamante hamutuk rihun tolunulu resin husi teritorio Timor laran tomak, husi dadus hirak ne’e Munisipiu Ermera mak ho valor as liu Munisipiu sira seluk. Lia-hirak ne’e hato’o husi Ministru MAKLN iha salaun Três de Março Dili.
Iha entervista ho Ministru ba Asuntu Kombatentes ba Libertasaun Nasional (MACLN) Gil da Costa Monteiro “Oan-Soru” liuhusi konvokatóriu reuniaun entre Prezidenti Kombatentes Libertasaun Nasionál (CCLN) no Komisariu Munisípiu 13 analiza kona-ba dadus reklamasaun no kontestasaun veteranu, nune’e sira lori mai hato’o iha nasional.
“Dadus hirak ne’ebé rekolla husi veteranu sira iha teritorio nasional ne’e, sei halo analizasaun husi MAKLN ba dadus refere iha fulan ida nia laran, komesa husi fulan marsu to’o fulan April 2025.” Dehan Oan-Soru
Prosesu agora tekniku sei halo sira-nia servisu, depois servisu ne’e hotu sei anunsia sai ba publiku, no nain-hira rekere husi 3-7 ba 8-14 balun hakarak ba 15-19, enkuanto dadus hirak ne’ebé boot liu mak husi Munisipiu Ermera.
“Atu klarifika tan deit dadus ne’ebé agora ami halo reklamasaun ne’e ho total rihun tolunulu resin maibé iha mós dadus uluk nian ne’e hamutuk rihun haatnulu resin ne’ebé agora iha hela baze dadus. maibé dadus fisiku iha komisariu sira nia liman, nune’e desizaun reklamasaun hotu ona bele rekolia hamutuk hodi ense iha lista baze de dadus, nune’e bele anunsia ona ba publiku.” Reafirma nia
Ministériu Oan Soru mós hato’o mensajen ba veteranu sira, mantein paz no estabilidade hodi garante situasaun kontroladu, labele hamosu manifestasaun, tanba veteranu ne’ebé hetan direitu ba pensaun bazeia ba dadus komprovativu sira ne’ebé aprezenta ho faktus tuir sasin kada Munisipiu.
“Hotu-hotu hakmatek lalika halo barullu, tanba dadus mak sei justifika katak ita bo’ot los ka lae no sira ne’ebe testamuña iha mak sei justifika, no ha’u husu ba ita hotu-hotu labele falsifika dokumentu tanba liuhusi prosessu sei hatene hotu, husu ba atu labele halo manifestasaun, emosaun tanba ne’e sei la fó solusaun ba problema.” Informa Ministériu Oan Soru
Atu esplika kle’an liután katak, husu ba veteranu sira atu hakmatek iha fatin no labele kria problema iha fatin servisu vetarnu nian, nune’e ekipa verifikasaun dokumentu ne’e bele lao ho lalais hodi publika naran veteranu nian, aleinde ne’e mós verifikasaun dadus ne’e sei hala’o durante fulan ida nia laran, husi fulan marsu to’o fulan April.
Reportajen : Domingas
Foto : Domingas