Dili, 20 Fevereiru 2025 (Média Democracia) – Ministeriu Agrikultura Pekuária Peska no Floresta (MAPPF) liuhusi Diresaun Floresta distribui motorizada tolunulu (30) no radiu komunikasaun HT hamutuk tolunulu (30) ba funsionariu guarda iha Munisípiu (7) inklui Rejiaun Espesial Oe-cusse Ambeno RAEOA, hodi hala’o servisu iha baze
Tuir Ministru Agrikultura Pekuária Peska no Floresta (MAPPF) Marcos da Cruz hateten, Ministeriu Agrikultura liuhusi Diresaun Floresta distribui motor no radiu komunikasaun HT, ba funsionariu iha Munisípiu 7 hala’o servisu hodi tau-matan ba ai-horis iha teritoriu Timor-Leste
“Motor no radiu komunikasaun HT hirak ne’e sei entrega ba guarda floresta no xefe delegasaun territorial floresta nian iha Munisípiu. Aleinde ne’e ita mós iha “bacias hidrograficas” haat hanesan iha Oe-cusse Tono, Lautem Raumoko, Suai Bee Lulik no Ainaro ne’ebé motor no sasan hirak ne’e sei entre tuir parte ne’ebé mensiona ona.” Dehan Ministru Agrikultura Pekuária Peska no Floresta (MAPPF), Marcos da Cruz
Nia hatutan objetivu mak atu fasilita funsionariu floresta sira hodi kontrola iha ai-laran sira nune’e ema labele tesi-ai arbiru hodi estraga ambiente. Ida seluk fornese ba Xefe Delegasaun sira atu bele tun baze hodi esplika ba komunidade sira oinsá tau importansia hodi servisu hamutuk ho estadu atu tau-matan ba ai-horis no kuda fali ai-oan iha fatin ne’ebé ai-horis laiha
“Durante ne’e ita klasefika ona rai ba areá protezida hanesan iha Lospalos Nino-Konisantana, Kablake, ne’e ita define ona sai parte nasional kairala nomos iha fatin seluk ai-horis ladun barak presiza ita hotu nia kontribuisaun hodi proteze, nune’e ema labele estraga hanesan iha Ramelau, Matebian, Mundu Perdidu nomos foho sira seluk.” Dehan MAPPF
Nia salenta motor ne’e fahe ba funsionariu sira ida hodi proteje, nomos ida seluk ba Xefe Delagasaun hodi tun ba baze hodi koalia ho komunidade oinsá bele tau-matan ai-horis, nune’e labele hamosu dezastre, inundasaun no erozaun hodi kria ambiente saudavel iha komunidade nia le’et
Rekomenda ba funsionariu ne’eb’e simu ona motorizada no radiu komunikasaun HT tenke utiliza ho didi’ak hodi halo servisu iha baze, tanba sasan hirak ne’e patrimoniu estadu nian, tanba sasan hirak ne’e sei ba tau hotu iha postu ida-idak nian, nune’e funsionariu sira hotu lori halo servisu
Iha fatin hanesan reprezentante servisu floresta Carlos Martins Soares hateten, sente orgullu tebes tanba iha oportunidade ida ne’e bele simu motor no radiu komunikasaun HT husi governu nune’e ba oin bele fasilita di’ak liután servisu iha baze
“Ha’u sente kontente tebes tanba ohin iha oportunidade ne’ebé di’ak tebes bele hetan “motor no radiu komunikasaun HT” husi governu liuhusi diresaun floresta utiliza hodi halo servisu hanesan kontrola komunidade sira iha area rurál, nune’e labele tesi-ai no estraga ai-horis arbiru, tanba durante ne’e ami halo servisu uza transporte rasik.” Dehan reprezentante servisu floresta, Carlos Martins Soares
Nia hatutan iha tinan barak nia laran hala’o servisu hetan dezafiu barak tebes tanba iha ema balun laiha tranporte privadu atu halo servisu iha areá ne’ebé dook husi hela fatin, entaun labele kobre iha areá hotu-hotu maibé agora iha transporte ona fiar katak bele fasilita servisu hotu sei la’o kontroladu no susesu
Esplika liután orsamentu ne’ebé gasta ba motorizada no radiu komunikasaun HT ne’e hamutuk 82 mill ne’e mai husi programa SAPIP. iha tinan 2014 ne’ebé Primeru Ministru Kayrala Xanana Gusmão mak halo proposta hetan aprovasaun husi Banku Mundiál ho Osamentu totál (21) mill hodi halo dezenvolvementu husi 2016 to’o agora
Reportajen : Nelfiano
Foto : Nelfiano