Dili, 12 Novembru 2024 (Media Democracia) – Selebrasaun Loron Masakre Santa Krúz ba dala 33, Nune’e Lorico Adventure (Load) halo viajen ho motorizada haleu Territóriu Timor-Leste hodi Vizita Juventude Rezisténsia 12 sira-nia Rate nomos ba tau matan ba Sobrevivente ne’ebé sei moris namkari iha Timor laran tomak.
Aleinde ne’e iha mós grupu Juventude Hadomi Natureza ne’ebé ho voluntáriu la’o ain husi Munisípiu Lautém to’o iha Kapitál Dili, hodi selebra loron nasionál Juventude ba dala 19.
Reprezentante husi grupu Lorico Adventure ho naran Kódigu Loriku Mean Haktuir, Liuhusi Fatin Santa Krúz ne’e mak mundu tomak koñese kona-ba Juventude Timor-Leste ne’ebé hakarak liberta-an husi Indonézia.
“Ita hotu hatene katak, husi rate ne’e, husi fatin ida ne’e mak mundu tomak hatene katak juventude iha momentu ne’ebá fó sira-nia an, fó sira nia hanoin, fó buat hotu ne’ebe sira iha atu bele hatudu ba mundu katak Timor hakarak duni hamrik mesak, Timor hakarak liberta-nia an husi okupasaun Indonézia.” Haktuir Reprezenta LOAD
Nia dehan nu’udar jerasaun foun hakarak kontinua ba saida mak uluk Juventude rezisténsia sira halo iha tinan 1991.
“Ami hakarak kontinua saida mak ami-nia maun, aman sira ne’ebé uluk halo iha 91 atu nune’e buat hotu ne’ebé sira fó, valór ne’ebé sira tau ba iha sira-nia kontribuisaun hodi liberta rai ida ne’e atu labele monu de’it.” Nia dehan
Liuhusi Kontribuisaun ne’e mak Grupu Lorico Adventure la’ós Vizita Matebian Juventude rezisténsia 12 de Novembru sira-nia rate hodi tau ai-funan no sunu lilin hodi hatudu katak Lorico Adventure sei la haluha Matebian Juventude rezisténsia nomos sira-nia espíritu sei la haluha hodi tau matan ba Juventude tempu agora iha Timor-Leste hodi kontribui ba dezenvolvimentu nasaun nian.
Iha viajen haleu Territóriu ne’e, grupu refere mós halo vizita ba Sobrevivente sira ne’ebé sei moris namkari iha Timor laran tomak hodi haree no observa sira-nia situasaun.
“Balun ne’ebé mate ikus soe hela sira-nia fe’en sira-nia oan, entaun ami ba hasoru sira dada lia ho sira, hako’ak sira tinan-ida dala ida mós laiha problema, importante ami ba vizita nafatin atu nune’e sira labele sente dehan sira mesak maibé ita hamutuk. Atu nune’e sira bele sente katak ita valoriza dunik kontribuisaun ne’ebé sira fó.” Nia dehan
Iha biban ne’e mós Reprezentante Grupu Juventude Natureza Aida Ratna de Deus hatutan, Grupu refere la’o ain husi Munisípiu Lautém to’o iha kapitál Dili ne’e atu komemora loron Masakre Santa Krúz no Loron Nasionál Juventude nian.
“Objetivu husi la’o ain ninian mak, primeiru atu komemora loron nasional Juventude ba dala 19 nian, depois segundu fó onra ba Heroi libertasaun nasional liuhusi dalan marka forsa nian hodi fó hanoin hikas ba jerasaun foun katak istória libertasaun hahú husi foho, Mota, Ai-laran nomos sidade.” Aida hatutan
Nia haktuir la’o ain husi Lautém ne’e kompostu husi membru grupu Juventude Hadomi Natureza hamutuk 15.
“Iha ne’e ami na’in sanulu mak kompleta husi Lautem mai to’o iha Dili, depois mai to’o iha Baucau iha mós ami-nia ekipa na’in 5 tan ne’ebé suporta ami tan iha Baucau to’o mai iha Dili. Nune’e ami hamutuk 15 pesoas mak iha ne’e no kolega balu sei iha kotuk ne’ebá.” Nia haktuir
Enkuantu Dezafiu ne’ebé grupu ne’e hasoru durante la’o ain husi Munisípiu Lautém to’o iha Kapitál Dili hanesan Rai manas no kolen, maibé ida ne’e la sai obstákulu hodi impede viajen ne’e maibé sira kontinua la’o hodi tuir Heroi sira-nia Ain fatin.
Enkuantu Joven hadomi natureza ne’e kompostu husi Joventude sira Universitáriu no Ensinu Sekundáriu hanesn ESHANA UNTL, ESHANA Unital, ESHANA Unpaz, ESHANA Paulo IV nian, Nomos Juventude Hadomi Natureza rasik.
Reportajen : Estefania
Foto : Estefania