Dili, 06 Janeiru 2025 (Média Democracia) – Regina de Jesus ho idade neen-nulu resin-tolu (63) iha oan na’in haat (4) mane rua (2) no feto rua (2) husi munisípiu Bobonaru no dadaun ne’e hela iha munisípiu Dili postu Dom-Aleixu suku Comoro beto barat, kria rasik negósiu ki’ik iha dalan ninin hodi responde ba presiza loro-loron nian
Negosiante Regina de Jesus hateten, nia kaben husik hela duarante tinan salunulu-resin ona nune’e nia deside hodi halo atividade negósiu ki’ik hanesan fa’an modo tahan hodi responde ba nesesidade loron-loron nian tanba tur de’it iha uma la hetan osan
“Modo tahan ne’ebé ha’u hola kada loron hanesan ai-farina tahan, lakeru dikin, bayan no aidila-okir, bainhira ema lori mai husi Munisipiu Likisa entaun ha’u sempre hola hamutuk $17 dolar nune’e bele kesi fahe fila-fali ba futun ida $0,50 atu ema bele hola tanba iha kampu-baru ema barak mak fa’an modo tahan ne’ebé folin hotu maibé depende ba sorte ida’idak nian.” Dehan Negosiante Regina de Jesus
Nia hatutan osan ne’ebé durante uza lori halo negósiu ki’ik ne’e ha’u nia osan rasik simu husi terseira idade nune’e deside kria negosiu ki’ik hanesan fa’an modo iha dalan ninin nune’e bele hetan osan hodi responde ba presiza nian
“Maske sasan ne’ebé folin ho rendimentu ne’ebé ki’ik kada loron sempre folin $ 3.00 too 4.00 maibé sei bazeia mós ba komprador sira tanba ema barak moris halo negosiu iha dalan ninin, maibé esforsu aan nafatin fa’an tanba moris ne’e depende negósiu nune’e bele reponde ba nesesidade nian.” Dehan nia
Nia afirma kada loron sempre hetan osan ho rendimentu ne’ebé naton 4.00 dolar ba leten maibé haree mós ba situasaun bainhira Gurada Munisipiu Dili mai halo revista entaun sasan labele folin to’o $4 dolar maibé esforsu-aan nafatin maske hetan dezafiu oioin
Atu esplika kle’an liután katak maske inan faluk Regina nia kaben husik hela iha tempu naruk nia laran maibé nia nafatin esforsu-aan hodi buka osan liuhusi kria negosiu ki’ik hanesan fa’an modo taha iha dalan ninin nune’e bele hetan osan hodi responde ba nia presiza loron-lorn nian.
Reportajen : Nelfiano
Foto : Nelfiano