Dili, 02 Marsu 2025 (Média Democracia) – Joana de Conseição ho idade (69) mai husi Munisípiu Likisa Postu-Administrativu Likisa Suku Tibar Aldeia Turleo, daudaun ne’e hela iha mota ninin beduku loron-loron halo atividade servisu hanesan tuku fatuk-britas bele fa’an hodi sustenta ba presiza nian.
Tuir Joana de Conseição hateten, durante ne’e halo atividade servisu hanesan hili fatuk iha mota laran, nune’e tau hamutuk iha fatin ida to’o barak ona lalin sai ba rai maran hafoin tuku halo rahun sai fatuk britas no fahe ba parte rua ki’ik no boot.
“Iha momentu ha’u sei iha forsa halo servisu hanesan pinera raihenek iha mota laran bainhira ema mai hola ha’u rasik mak tula ba kareta ne’e, tanba ha’u sei iha forsa, maibé agora ha’u laiha forsa atu pinera raihenek no tula ba kareta, tanba ida ne’e servisu ne’ebé todan tebes. Entaun ha’u deside nafatin halo servisu ki’ik hanesan hili fatuk iha mota laran, nune’e bele tuku halo fatuk britas no fa’an hodi sustenta nesesidade loron-loron.” Dehan Joana de Conseição
Nia hatutan fatuk-britas ne’ebé loron-loron tuku fahe ba parte rua ki’ik no boot tanba iha ema balun atu mai hola dalaruma hakarak fatuk britas boot no balun buka de’it ki’ik, iha ema balun mós mai hakarak hola hotu britas boot no ki’ik
“Fatuk britas ne’ebé loron-loron ha’u tuku ki’ik boot ha’u sempre tau keta-ketak, nune’e atu ense ba karon karik ulun labele moras. Loron tomak mak ha’u laba hili fatuk iha mota laran, mak ha’u tuku de’it fatuk iha uma, entaun loron tomak ida bele hetan karon haat to’o lima maibé dadersan ba hili lorokraik mak tuku entaun hetan de’it karon rua, tanba ita tuku fatuk ne’e la fasil bainhira uza liman sempre kanek maibé ida ne’e kabun mak obriga.” Dehan nia
Nia salienta fatuk britas ne’ebé nia tuku fa’an ho folin baratu, karon ida sempre fa’an $2.00 dolar lae 2.50. bainhira fa’an karun liu ema la hola dalaruma ba hola tia ema seluk nia fatuk tanba folin baratu.
“Fatuk ne’ebé ha’u fa’an semana ida dalaruma ema mai hola karon rua lae tolu ba leten. Entaun ha’u sempre tau hamutuk osan hodi hola ha’u nia presiza. Tanba ita la halo servisu tur de’it iha uma se mak atu ajuda ita, ne’eduni buat hotu ita tenke esforsu-aan halo servisu tuir kbiit ne’ebé nai maromak haraik mai ita. Maske iha servisu nia laran sempre hasoru difikuldade oioin maibé liuhusi orasaun ne’ebé ita husu ba nai maromak sempre akompaña buat lao ho di’ak.” Nia haktuir
Nia afirma maske halo servisu ne’ebé todan maibé liuhusi orasaun ne’ebé husu ba maromak sempre akompaña, nune’e buat hotu bele lao ho hakmatek
“Durante ne’e ha’u halo servisu hanesan tuku fatuk britas maibé iha loron balun nia laran ha’u fahe mós tempo hanesan segunda, kuarta no sabadu ha’u sempre ba halo limpeza iha igreja hodi husu tulun ba nai maromak hodi fó nafatin forsa no kbiit no labele hetan moras fó impaktu ba atividade loron-loron nian.” Nia informa
Esplika liután tuku fatuk-britas hanesan servisu ki’ik ne’ebé avo Joana halo sai hanesan toos no natar ba nia moris loron-loron. Maske ho idade ne’ebé boot maibé ida ne’e la sai obstakulu ba moris loron-loron nian. Tanba buat hotu tenke servisu no buka rasik nune’e bele hetan osan hodi fasilita ba nesesidade nian.
Reportajen : Nelfiano
Foto : Nelfiano