Dili, 12 Janeiru 2025 (Média Democracia) – Ministériu ba Asuntus Kombatentes Libertasaun Nasionál (MAKLN), dadauk ne’e nia ekipa sira halo hela identifikasaun ba mate-ruin hamutuk atus-rua resin (200 resin) ne’ebé durante ne’e konserva hela iha Hospitál Nasional Guido Valadáres (HNGV), Bidau-Dili.
Ministru Asuntu Kombatentes Libertasaun Nasionál MAKLN, Gil da Costa Monteiro “Oan Soru” hateten, mate-ruin hamutuk 200 resin ne’e foti sai husi areadór Palásiu Governu bainhira Empréza BTK iha tempu ne’ebá kee-rai atu halo ‘tanke bee’ nian mak hetan. Bainhira kee sai tiha hotu, Ministériu Solidariedade Sosiál deside transporta hotu mate-ruin sira ne’e lori bá konserva iha HNGV.
“Ekipa Ministériu nian bá dala-hira ona iha HNGV, hodi haree restus-mortais hirak ne’ebé ema baibain dehan hamutuk 200 resin. Agora, kona-bá ruin ne’e barak liu, ita-boot sira hatene. Ha’u mós naton koalia ne’e ha’u nia fuuk sei metan hela, agora ha’u nia fuuk mutin barak liu ona, maibé seidauk identifika nafatin ruin sira ne’e. No ruin hirak ne’e evakua iha hospital HNGV.” Dehan Ministru Asuntu Kombatentes Libertasaun Nasionál MAKLN, Gil da Costa Monteiro “Oan Soru”
Ministru hatutan, to’o ona ohin loron, seidauk iha Timoroan ida bá aprezenta iha Ministériu ka iha Conselho dos Combatentes da Libertação Nacional (CCLN), katak, sira-nia aman ka tiun ka avón, naton inimigu oho ne’e, hakoi hotu iha Palacio do Governo nia oin.
Ministru mós afirma, hatán kona-ba asuntu sira ne’e, karik Governu Konstitusionál liuhusi MAKLN iha planu atu halo teste DNA ba mate-ruin sira ne’e, maibé atu teste loos ho sé. Ba teste ho José ka teste ho António.
“Se mak agora bele fornese nia ran. Ne’e laiha, nune’e ami nia ekipa koloka iha hela ne’eba hodi buka hatene liuhusi organizasaun rezisténsia nian, ne’ebé ekipa sira iha tempu koalia kona-bá rekolla restos mortais, nomos iha ekipa ne’ebé naton foti ruin ne’e iha hela no sira aprezenta ona mai Ministériu katak, tempu ne’eba ami foti ruin ida-ne’e, tanba iha akontesimentu ida hanesan ne’e. Entaun ida-ne’e ita bele deskonfia hanesan deskoñesidu, maibé, prova katak, akontesimentu ida mós iha ne’eba maibé agora laiha familia ida atu ba husu, nune’e ita atu prova ho sé.” Afirma Ministru “Oan Soru”.
Ministru informa, deskobre liuhusi mate-ruin hamutuk atus-rua resin ne’ebé oras ne’e konserva iha HNGV, iha fali tán mate-ruin hamutuk 14 seluk mak katorigozadu ba rezisténsia nia ema maibé ita presiza mós halo teste didi’ak, foin bele detekta lolos katak ema ne’e rezisténsia luta ba rai ida ne’e.
Ministru relata, mate-ruin sira ne’ebé tau iha HNGV ne’e Ministériu mak haruka hodi rekolla. No daudaun ne’e mós ekipa Ministeriu nian koloka hela iha ne’eba. Enkuantu mate-ruin sira ne’ebé kategoriza ba Rezisténsia nia ema, Governante ne’e sei entrega hotu ba Ministériu Solidariedade Sosiál no Inkluzaun (MSSI), atu lori ba hakoi.
Reportajen : Nelfiano
Foto : Nelfiano