Dili, 03 Outobru 2025 (Média Democracia) – Ministeriu Komersiu Industria asina akordu servisu kooperasaun ho Telkomsel ho programa “Hakbiit Micro, Pequenas e Media Emprezas Liuhusi sistema Digitalizasaun. Atividades asina akordu ne’e hala’o iha Suai room Timor Plaza.
Iha entrevista ho Diretor Jeral Ministeriu Komersiu Industria Matins Magno hateten, akordu ne’ebé ohin asina husi MCI ho Telkomsel ne’e importante tebes oinsa bele fasilita industria kiik sira ne’ebé eziste iha Timor hodi kria konektividade, akompaña ho situasaun modernizasaun nian.
“Timor hanesan nasaun ida ne’ebé agora daudaun tama ona ba iha mundu teknologia avansadu no ezizte ona asina akordu ida ne’e atu fasilita di’ak liután industrializasaun micro kiik sira, nune’e bele fasilita formasaun liuhusi online de’it.” Dehan Diretor Jeral Ministeriu Komersiu Industria Matins Magno
Nia informa, husi parte Telkomsel rasik sei fó formasaun ka fasilitasaun ba iha membru MCI sira oinsa atu bele uza teknologia ne’e ho nia funsaun, nunee bele kria konektividade ne’ebé di’ak liu tan iha rai, liuliu ba iha micro pequenas ne’ebé tenke tau atensaun husi estadu hodi haree ba orsamentu sira ne’ebé atu apoiu ba micro pequena sira, nunee bele fasilita no hakman micro kiik sira ne’ebé eziste.
Hatutan, husi CEO Telkomsel Beneditus, kontente tebes ho atividade ohin loron nian Telkomsel hamutuk ho MCI atu asina akordu servisu kooperasaun ida husi parte rua ne’e atu servisu hamutuk hodi haree ba iha micro industia kiik sira ne’ebé iha ona no haree liubá teknologia nian
“Inovasaun digital haree ba dezenvolvimentu nasional atu dudu dezenvolve ekonomia liuhusi media digitalizasaun ekonomia, sai hanesan inspirasaun ida husi ami telkomsel hanesan parseiru ida ne’ebé atu servisu hamutuk ho governu nomos ami hetan apoiu atu avansa ekonomia media digitalizasaun iha nasaun Timor-Leste.” Hatutan CEO Telkomsel Beneditus
Nia informa, haree ba parte ida ne’e telkomsel hanesan atendementu ba konektividade ne’ebé atu fó benefisiu di’ak ba komunidade sira nomos servisu ida ne’e tuir despasiu ne’ebé husi MCI rasik atu haree ba iha komunikasaun diskusaun nomos inspirasaun inklui mós atividade sira ne’ebé hala’o husi MCI no telkomsel nian.
“Ita kontente tebes tanba Telkomsel bele servisu hamutuk ho MCI no insiu servisu ida sei di’ak liután no avansa nafatin ba iha future, Telkomsel mós sai hanesan parte ida husi instituisaun atu ajuda MCI hodi avansa iha media digitalizasaun nian.” Informa CEO Telkomsel Beneditus
Nia reafirma, misaun Telkomsel nian atu halo atendimentu ho fuan hodi bele fó benefisiu di’ak ba komunidade sira tanba ne’e Telkomsel hakarak servisu hamutuk ho MCI atu bele fasilita koneksaun ida ne’ebé di’ak ba ekosistema digitalizasaun iha industria no komersiu iha Timor-Leste.
Ministru Industria Komersiu Nino Pereira hateten, agradese ba parte rua ba momentu ida ne’e ho pasu ida importante tebes ba Telkomsel rasik nomos ba Ministeriu Industria Komersiu liuliu ba transformasaun digital, tanba agora iha mundu digitalizasaun bele fasilita prosesu dezenvolvimentu.
“Ita hatene katak koalia kona-ba ekonomia digital iha mudansa ba teknologia ne’ebé lais tebes foin lalais MCI ba partisipa iha atividade ida iha China Asian expo nian ne’ebé koalia kona-ba AI iha mundu teknologia. No ohin ita agradese asina akordu ida ne’e atu servisu hamutuk ho Telkomsel hodi bele avansa iha industria ekonomia digitalizasaun nian.” Dehan Ministru Industria Komersiu Nino Pereira
Nia informa, Timor-Leste hanesan nasaun ne’ebé hamrik iha era millineal ninian iha 2000 sae mai no komesa tama ona ba iha prosesu transformasaun digital, tanba ne’e tenke tau importansia no haree ba iha konektividade sira ne’ebé koalia kona-ba transformasaun digital no aproveita modernizasaun ne’e hodi transforma ekonomia rai laran.
“Ita aproveita servisu hamutuk ho parseria barak no apoiu ne’ebé iha hanesan oportunidade ida di’ak atu ita bele halo dezenvolve ita-nia ekonomia rai laran nian, tanba ohin loron mundu digitalizasaun ita presiza halo adaptasaun hodi bele atinji ekonomia maske iha impaktu maibé nia benefisiu mós makas ba dezenvolvimento ekonomia, tanba ita konekta ona ka servisu hamutuk ona ho organizasaun mundial komersiu nian, nune’e sei iha prosesu nia laran atu hadia no atinji ba ekonomia inklui mos ita sei sai hanesan membru ASEAN.” Informa Ministru Industria Komersiu Nino Pereira
Nia konklui ohin MCI asina ona akordu kooperasaun servisu ida ho Telkomsel hodi haree ba mikro pequena sira atu bele apoiu sira halo adaptasaun ba mundu digitalizasaun nian, Nune’e Ministeriu hakarak hato’o agradese ba komponente boot Telkomsel ne’ebé loke ona odamatan ba MCI liuhusi kooperasaun ida ne’e no sei fahe formasaun no sosializasaun ba mikro kiik sira no sei kria ekosistema ida ne’ebé sei fasilita mikro kiik sira atu bele dezenvolve sira nia an di’ak liután iha teknologia.
Reportajen : Domingas
Foto : Domingas