Dili, 29 Jullu 2025 (Média Democracia) – Ekipa konjunta kompostu husi Komandu Polísia Nasional Timor-Leste (PNTL) Munisípiu Liquiça liuhusi Diresaun Servisu Informasaun Polísia (DSIP) no Komandu Falintil Forsa Defesa Timor-Leste (F-FDTL), destakadu iha Munisípiu Liquiça simu informasaun iha loron 27 Jullu 2025 katak kareta ho marka Carry no Grand Max tula sasan kontra-bandu husi diresaun Loes atu mai kapital Dili, nune’e halo kedas indentifikasaun. Informasaun hirak ne’e Media Democracia asesu husi pajina PNTL Tersa semana ne’e.
Porta-voz Komandu PNTL Superintendente Polísia João Belo dos Reis hateten, liuhusi konferensia imprensa Segunda-feira (28/07) ne’e relata ekipa konjunta detekta aktividade kontra-bandu balun iha fronteira, nune’e halo operasaun, hapara aktividade kontra-bandu ne’ebé importa sasan Bebidas lubuk ida husi fronteira mai iha kapital Dili.
“Daudaun ne’e prosesu lao hela no sasan ne’ebé ami prende sei aprezenta mós ba Ministeriu Públiku (MP) Maliana nune’e ohin ita halo hela identifikasaun husi dadus ne’ebé ita rekolla, membru PNTL ida mós fasilita, lori nia kareta ba tula sasan ne’ebé kontra-bandu.” Dehan Porta-voz Komandu PNTL, João Belo dos Reis
Superintendente Polísia ne’e subliña tanba saida maka membru PNTL ne’e ba, tanba saida maka nia tula, ida ne’e sei iha prosesu identifikasaun lao hela. Evidensia sira husu operasaun dadaun ne’e asegura hela iha Diresaun Servisu Investigasaun Kriminal (DSIK) no sei transporta ba Minísteriu Publiku Maliana.
“Ekipa konjunta identifika kareta rua refere (Carry & Grand Max) ne’ebé tula Bebidas kontra-bandu hanesan Coca-cola hamutuk 132, kaixa = 3168, Sprite hamutuk 126, Kaixa = 3026 kaleng, no Y.C one 1000 hamutuk 55 Kaixa, botir 29 = 1679 Botir.” Haktuir Superintendente Polísia
Aktual Diretúr DSIK ne’e hatutan tan katak, suspeitu sira ne’ebé ekipa konjunta evakua hodi halo identifikasaun hamutuk na’in ha’at (4) ho inisial A.S.G, A.L, L.P no T.C.L. nune’e hodi hein prosesu tuir mai
Esplika liután ekipa konjunta kompostu husi Komandu Polísia Nasional Timor-Leste (PNTL) Munisípiu Liquiça liuhusi Diresaun Servisu Informasaun Polísia (DSIP) no Komandu Falintil Forsa Defesa Timor-Leste (F-FDTL) ne’ebé destakadu iha Munisípiu Liquiça, iha loron 27 fulan Jullu tinan 2025, hafoin simu informasaun katak iha kareta ho marka Carry no Grand Max tula sasan kontra-bandu husi diresaun Loes atu mai kapital Dili ho dalan ilegal, nune’e halo kedas operasaun hodi kaptura no identifikasaun.
Reportajen : Nelfiano
Foto : Média PNTL