Dili, 02 Juñu 2025 (Média Democracia) – Prezidente Republika José Ramos Horta hato’o mensajen ba selebrasaun Loron Mundial Labarik sira iha Timor-Leste no mundu tomak, ne’ebé selebra iha loron 1 Fulan juñu tinan 2025.
Nia dehan, iha Loron Mundiál Labarik sira nian, ita selebra rikusoin boot liu no esperansa nabilan liubá aban bainrua. Labarik ida-idak lori mehi iha sira nia fuan ne’ebé sei forma ita-nia nasaun no mundu, bainhira fó onra ba loron espesial ida ne’e, hakarak labarik ida-idak iha Timor-Leste hatene katak sira nia valór, sira domin, no labarik lian iha importánsia. Husi Tasi Feto to’o Tasi Mane, husi suku rurál to’o sentru urbanu, labarik ida-idak merese hetan oportunidade atu aprende, atu sai boot iha sira mehi.
“Ita-nia nasaun moris husi korajen no sakrifísiu husi sira ne’ebé fiar ba aban-bainrua ne’ebé di’ak liu. Loron ohin, futuru ne’e pertense ba imi. Imi mak herdeiru sira ba ita-nia independensia, guardiaun sira ba ita-nia kultura, no arkitetu sira ba ita-nia futuru. Imi-nia edukasaun la’os de’it imi-nia direitu – ne’e mak fundasaun ne’ebé ita-nia nasaun sei kontinua atu harii pás, prosperidade, no progresu.” Dehan Prezidente Republika José Ramos Horta
Nia hatutan investimentu loloos ba labarik sira hahú antes moris. Ita tenke fó apoiu ba inan sira ne’ebé isin-rua ho kualidade kuidadu prenatal, asegura isin-rua ne’ebé saudavel no partu ne’ebé seguru. ita-nia kompromisu estende ba kuidadu bebe foin moris, promove fó-susubeen inan nian, no estabelese programa primeira infánsia ne’ebé forte. Asesu ba bee moos, saneamentu ne’ebé di’ak, no edukasaun pré-eskolár ne’ebé komprensivu forma baze ba dezenvolvimentu saudavel.
“Labarik ida-idak merese hetan protesaun husi perigu, kuidadu saúde no edukasaun ne’ebé kualidade, hahán nutritivu, no direitu fundamentál atu halimar no simplesmente sai labarik. Hirak-ne’e la’os privilejiu sira ne’e mak direitu fundamental sira ne’ebé ita tenke salvaguarda ba foin-sa’e ida-idak iha ita-nia nasaun. Ba ita-nia foin-sa’e sira ne’ebé hatudu ona lideransa iha ita-nia komunidade sira, aprende língua oioin, envolve iha teknolojia, no liga ho mundu enkuantu kontinua metin iha ita-nia valór nu’udar Timoroan, imi inspira ami hotu. Imi prova katak ki’ik iha medida la limita grandeza husi ita-nia mehi no susesu.” Hatutan Prezidente Republika
Nia informa inan-aman, mestre, no líder komunitáriu sira, mai ita kompromete fali ita-nia-an atu kria ambiente ne’ebé labarik sira bele moris diak. Ita tenke rona sira-nia hanoin, apoia sira-nia aspirasaun, no asegura katak desizaun hotu-hotu ne’ebé ita halo konsidera ninia impaktu ba jerasaun sira iha futuru.
“Hamutuk, ita sei harii Timor-Leste ida iha-ne’ebé labarik ida-idak bele tuir eskola, sente seguru, mehi la iha limitasaun, no hatene katak sira iha fatin importante iha ita-nia nasaun nia istória. Ida-ne’e signifika investe iha klínika saúde maternal, haluan sentru edukasaun infantil, hadi’a infrastrutura bee no saneamentu, no asegura katak labarik ida-idak hetan nutrisaun ne’ebé di’ak dezde sira nia loron dahuluk.” Informa PR José Ramos Horta
Labarik sira hotu, imi la’os de’it líder ba aban-bainrua nian, imi importante ba loron ohin. Imi nia kuriosidade, alegria, pergunta, no mehi sira importante. Kontinua aprende, kontinua husu pergunta, kontinua fiar iha imi-nia an rasik, no nunka haluha katak imi iha kbiit atu halo mundu sai di’ak liután.
Hein katak Loron Mundiál ba Labarik ida ne’e fó hanoin mai ita hotu katak investe iha labarik sira hahu husi kuidadu pré-natal to’o edukasaun infantil mak investe iha pás, prosperidade, no futuru ne’ebé murak ba ita-nia rai doben Timor-Leste. Ho domin no votus felisidades ba labarik sira hotu iha Timor-Leste no iha mundu tomak.
Reportajen : Domingas
Foto : Media Officer PR