Dili, 03 Maio 2025 (Média Democracia) – Prezidente da Republika José Ramos Horta hato’o mensajen iha ambitu komemorasaun Loron Liberdade Imprensa ba jornalista sira husi imprensa, jornalista, profisionál média no sidadaun Timor-Leste,
Prezidente Republika, José Ramos Horta hateten ohin komemora Loron Mundial Liberdade Imprensa 2025, hato’o saudasaun kmanek ba jornalista sira hotu, profisionál média no defensór ba liberdade espresaun sira iha Timor-Leste no iha mundu tomak, tane aas pilar ezensiál demokrasia nian liuhusi kompromisu ba lia-loos, transparénsia no integridade informasaun
“Ita-nia nasaun nia viajen ba independénsia hakerek husi jornalista barani sira ne’ebé ariska sira-nia moris atu partilla ita-nia luta ba mundu. Sira-nia korajen fó hanoin mai ita katak liberdade imprensa la’ós de’it prinsípiu ida maibé direitu ida ne’ebé manán ho susar no ezije protesaun no kuidadu kontínua.” Dehan Prezidente Republika, Joée Ramos Horta
Prezidente hatutan Timor-Leste halo ona progresu notavel iha dezenvolvimentu panorama média independente ida. Jornalista servisu la hatene kolen, dala barak iha sirkuństánsia dezafiante, hodi informa sidadaun sira no responsabiliza podérozu. Sira-nia dedikasaun merese la’ós de’it rekoñesimentu maibé protesaun ne’ebé metin.
“Ha’u husu ba setór hotu sosiedade nian atu rekoñese katak imprensa livre serve ita hotu. Bainhira jornalista sira bele servisu la ho ta’uk, sosiedade sira buras ho koñesimentu no komprensaun.” Dehan Prezidente Republika
Hatutan Prezidente Republika bainhira refleta kona-ba loron importante ida-ne’e, hodi hanoin katak liberdade imprensa la’ós ideál abstratu maibé prátika moris ida ne’ebé ezije vijilánsia no apoiu konstante. Kaneta de facto, sei forte liu surik, bainhira asegura katak nia portadór sira bele hakerek sein tauk ka favoritizmu.
Esplika liután iha Loron Mundial Liberdade Imprensa ida-ne’e, hakarak hato’o gratidaun ba jornalista no profisionál mídia sira hotu ne’ebé sira-nia servisu fortalese diálogu nasionál no mantein sidadaun sira informadu. Hein katak imi-nia kompromisu ba lia-loos kontinua ilumina ita-nia dalan ba oin.
Reportajen : Domingas
Foto : Media Officer PR