Dili, 14 Outubru 2025 (Média Democracia) – Ministeiru Ensinu Superiór Siénsia no Kultura (MESSK) konvoka reuniaun ho estrutura UNTL, husu aselera prosesu kazu asedu sexual iha FCS. Reuniaun ne’e hala’o iha salaun MESSK, Dili.
Iha entrevista ho Ministru Ensinu Superiór Siénsia no Kultura (MESSK) José Honório da Costa Pereira Jerónimo hateten, ohin dader nia parte bolu estrutura Universidade Nasionál Timor Lorosa’e (UNTL), hodi aprezenta kona-ba akontesimentu kazu asediu seksual ne’ebé akontese iha semana hirak liubá, ne’ebé viral iha media sosial relasaun ho asedu sekual iha kampus FCSP Departamentu Polítika Publika nian.
“Tanba ne’e, ohin dader ha’u bolu estrutura UNTL mai iha ne’e, no husu sira atu aselera lalais kazu ligadu ho asédiu sexuál ne’ebé akontese iha Fakuldade Siénsia Sosiál, Ita-boot sira hatene katak iha semana hirak liubá, kazu ne’ebé virál iha mídia sosiál nomos estudante sira halo konferénsia imprensa, tanba ne’e hanesan Ministru husu atu haree didiak asuntu ne’e ho kle’an.” Dehan Ministru Ensinu Superiór Siénsia no Kultura (MESSK) José Honório da Costa Pereira Jerónimo
Nia informa, Aleinde mos, Ministeriu asina ona konkordansia ho UN-WOMEN kona-ba seguru ba kampus, nune’e husu sira sei haree kazu por kazu. Nune’e iha enkontru referidu, Ministeriu mós apela ba estrutura UNTL atu aselera prosesu kazu referidu.
“Prosesu Konsellu Dixiplinár mós haruka ona karta ba Komisaun Funsaun Públika tanba nia funsionáriu públiku, depois mak KFP mak hasai desizaun ba Dosente ne’ebé komete kazu, Ha’u apela katak universidade tenke seguru ba estudante sira, sé de’it mak eskola iha ne’ebá no tenke respeita estudante sira no estudante tenke hato’o ba parte relevante karik Dosente halo asédiu sexuál ba sira.” Informa Ministru Ensinu Superiór Siénsia no Kultura (MESSK)
Governante ne’e akresenta, Universidade Nasionál Timor Lorosa’e, suspende ona suspeitu MFB ne’ebé komete asédiu sexuál iha Fakuldade Siénsia Sosiál e Polítika iha Departamentu Polítika Publika.
“Husi UNTL rasik suspende ona Dosente MFB hodi labele hanorin bainhira nia iha hela kazu maibé kuandu atu kontinua hanorin ka lae ne’e depende ba nia kazu, tanba nia ema funsionáriu públiku, nune’e desizaun hotu iha Komisaun Funsaun Públika nia liman.” Akresenta Ministru José Honório hatete.
Nia afirma, étika, morál no respeita ne’e importante ba kada Dosente nomos estudante, parte tolu ne’e iha ligasaun ba malu, tanba kuandu iha identidade mak iha dignidade.
“Ita-nia kultura ne’e la’ós anarkizmu, brutalizmu, maibé ita-nia kultura ne’e diálogu, entaun husi ne’e ha’u apela ba estrutura UNTL atu halo enkontru regular ida hodi hatene saida mak akontese, tanba kazu ida hanesan ne’e ita tenke halo sensibilidade lalais no rezolve, ita labele husik to’o grave.” Afirma Ministru Ensinu Superiór Siénsia no Kultura (MESSK) José Honório da Costa Pereira Jerónimo
Ligadu ho kazu asedu sexual iha Fakuldade Medisina Siensia no Saude, Ministeriu Ensino Superior Siensia no Kultura José Honorio hateten, husi parte Dekana informa ona ba nia katak, profesor referidu suspende ona husu nia kargu, no desizaun sei hein husu Komisaun funsaun publiku KFP.
Reportajen : Domingas
Foto : Domingas