Dili, 6 Novembru 2025 (Média Democracia) – Ministériu Interior liuhusi komunikadu imprensa ne’ebé hato’o husi porta-voz Seguransa Superintendente Asistente, Ministériu Interior Mouzinho T. Correia atualiza informasaun kona-bá asuntu seguransa nian ba públiku Timor-Leste husi loron 27 fulan outubru to’o loron 02 fulan novembru tinan 2025 ho transparante no kredivel.
Porta-voz Superintendente Asistente Ministériu Interior Mouzinho T. Correia hateten, Objetivu prinsipal konferensia imprensa ida ne’e atu atualiza informasaun kona-bá asuntu seguransa nian ba públiku Timor-Leste husi periodu 27 outubru to’o 02 novembru 2025 ho transparante no kredivel.
“Insidente sira durante semana ida ne’e nia laran, iha insidente no asidente ne’ebé akontese iha Teritóriu Nasionál Timor-Leste. Sistema Jestaun Insidente PNTL ne’ebé instaladu iha 14 komandu Munisipiu rejista insidente sira kada loron, maka hahu husi loron 27 outubru to’o loron 2 novembru 2025 insidente ne’ebé rejista hamutuk hitunulu resin ualu (78).” Dehan Porta-voz Superintendente Asistente Ministériu Interior Mouzinho T. Correia
Porta-voz ne’e hatutan, husi total insidente sira ne’ebé ho numero as liu ka Top 5 insidente ne’ebé boot liu iha teritoriu nasional maka violensia domestika, sei okupa iha primeiru lugar ho total tolunulu resin-haat (34) insidente, tuir fali maka asaltu ho total ruanulu resin rua (22), asaltu seksual ho total lima (5), estraga propriedade ho total lima (5), no furto lima (5), tipu insidente lima ne’e maka maior ka okupa iha primeiru lugar iha relatoriu semana ida ne’e nian.
“Husi insidente sira ne’e hamosu tipu kazu oioin ne’ebé husi insidente refere hamosu ualunulu resin haat (84), kazu ba auto krime husi kazu ne’e ofensa ba integridade fizika simples sei domina ho total ruanulu resin lima (25), tuir fali maus tratus hamutuk tolunulu resin ida (31), ameasa lima (5), furto agravadu haat (4) no danu simples haat (4).” Hatutan Porta-voz Superintendente Asistente Ministériu Interior Mouzinho T. Correia
Nia informa, aproveita oportunidade ida ne’e mós atu informa katak baibain iha loron finadu kada tinan insidente asaltu barak liu ne’ebé MI tenta halo analiza ida hahu husi tinan 2021 to’o mai iha tinan 2025 ne’ebé iha dadus analiza ne’e hatudu katak kada tinan komesa numeru insidente ne’e tun liuliu iha loron 1 to’o loron 2 fulan novembru, haree fali ba dadus iha tinan 2021 nian ne’e Kazu insidente ne’e sei as iha tinan 2022 nian mós sei as, mai fali iha tinan 2023. to’o 2025 tun ka kazu insidente ne’e menus tebes ida ne’e Signifika katak joven sira komesa iha ona konsénsia moral servisu hamutuk ho PNTL garante situasaun durante loron finadu nian.
“Husi Kazu sira ne’e baibain akontese makas liu ne’e maka kazu asaltu maibé iha tinan ida ne’e dadus hatudu katak kazu asaltu tun liubá haat (4) durante selebra loron finadu nian, se ita kompara ho dadus iha tinan kotuk nian bainhira selebra loron finadu hanesan ne’e kazu asaltu bele makas ho total ruanulu resin maibé tinan ida ne’e diferente tebes, husi autoridade seguransa la haluha fó parabens ba joven sira no sidadaun hotu husi esforsu tomak servisu hamutuk ne’ebé iha ita konsege hatun numero insidente kazu asaltu nian iha ambitu loron finadu.” Informa Porta-voz Superintendente Asistente Ministériu Interior Mouzinho T. Correia
Porta-voz reafirma, iha insidente balun ne’ebé akontese iha loron 29 fulan outubru tinan 2025 iha estranjeiru nain haat ne’ebé tenta atu ultrapassa liña fronteira ilegalmente ba indonesia ho Timor-Leste, sira mai iha ne’e no sira tenta atu fila ho ilegalmente, entaun iha ne’ebá autoridade seguransa sira haruka sira fila-fali mai no konsege asegura hela sidadaun refere iha PNTL.
“Iha loron 30 Fulan outubru iha mós kazu ida ne’ebé akontese entre familia uma laran, suspeitu ho inisial GG taa kotu nia feto rasik nia liman, kazu ne’e akontese iha Munisipiu Viqueque, suku Luca, akontese krime ofensa ba integridade fizika agravadu kazu refere PNTL prosesu ona iha loron 4 fulan novembru ne’e, no aprezenta ona suspeitu ba primeiru interogatoriu iha TDD Baucau no resultadu suspeito hetan ona prizaun prevenetiva enkuantu vitima sei halo hela tratamentu iha ospital referal baucau nian.” Reafirma Porta-voz Superintendente Asistente Ministériu Interior Mouzinho T. Correia
Nia realsa, asidente trafiku ne’ebé involve motor no kareta iha asidente hamutuk tolunulu resin sia (39) ne’ebé akontese iha teritoriu nasional, iha asidente refere Ema mate hamutuk hitu, kanek todan lima, no kanek kma’an hamutuk haatnulu (40) iha parte seluk fali Ministeriu Interior mós hatama reseitas liuhusi polisia imigrasaun sira rekolla no parte diresaun nasional transporte rodaviario PNTL nian hetan husi reseitas refere hamutuk $123,715.00 dolar Amerika ne’ebé kompostu husi veiculu sira ne’ebé tama sai iha teritoriu nasional Timor-Leste.
Enkuantu movimento sidadaun estranjeiru sira ne’ebé ultrapassa iha ita nia pontu entrada sira hanesan Aeroportu no portu sira hamutuk 960429 pessoa/ema ne’ebé tama no sai kompostu husi ema tama hamutuk 484.200 no sai 476.229. iha parte seluk ita haree ba kareta tama sai liuhusi fronteira haat liga postu integradu haat ne’e maka Batugade, Salele, Sacato, Oesilo, husi liña fronteira haat ne’e iha Batugade nian reseitas hamutuk $1,575,00. iha fali Salele hamutuk $1,214.00, iha fali Sakato hamutuk $352.00 no Oesilo hamutuk $60.00 ho total reseitas $3.201.00, kompostu husi veiculu tama sai iha ita nia postu integradu sira.
Nia konklui, mensajen husi Ministeriu Interior husu ba joven sira no komunidade sira hodi sai parseriu ho autoridade seguransa sira atu nune’e bele garantia situasaun seguransa iha rai laran.
Reportajen : Domingas
Foto : Domingas