Dili 11 Setembru 2025 (Média Democracia) – Sarani Timor-Leste Selebra misa agradesimentu tinan ida (1) ba vizita Sua Santidade Ama Papa Francisco iha Timor-Leste, selebra misa aniversáriu ne’e hala’o iha Altar Santo Tasi-Tolu, Kuarta semana ne’e
Arcebispu Metropolita Díli, Dom Virgílio Cardeal do Carmo da Silva, hatete ohin loron espesial ba selebrasaun misa ho intensaun ba prezensa maktoban Sua Santidade Papa Francisco hanesan momentu istóriku ba kreda Timor-Leste nian
“Ohin ita hotu halibur hamutuk iha Altar Santo Tasi-tolu, ita rekoiñese fatin ida ne’e sai eventu istoriku boot rua (2) ne’ebé laos de’it hatudu sarani Timor-Leste nia fiar, maibé koloka rai Timor iha mapa mundu. Eventu istoriku ba dahuluk mak vizita maktoban Sua Santidade Papa João Paulo II iha tinan 1989, hatudu ba mundu katak povu Timor fiar nain, povu unidu hatene luta hamutuk, ba nia autodeterminasaun.” Dehan Arcebispu Metropolitana Díli, Dom Virgílio Cardeal do Carmo da Silva
Dom Virgílio hatutan haree ba eventu istoriku daruak nian, mak maktoban Papa Francisco nia vizita mai rai Timor-Leste iha loron 09 too 11 Fulan Setembru 2024, hatudu nia domin no simplisidade ba sarani Timoroan hotu liuhusi nia enkontru no mensajen. Maibé iha tinan 1989 Papa João Paulo II hatete, Imi mak masin rain nian no roman mundu nian, liu tiha tinan lubuk ida husi Papa João Paulo ll nia vizita ikus mai simu grasa ukun rasik-an ne’ebé halo sarani hotu moris iha roman liberdade nia laran
“Timor-Leste dala ida tan hatudu ba Mundu katak maske ita-nia rai ki’ik ida ne’e iha liu rohan mundu nian, iha roman fiar katólika nian ne’ebé nabilan dadaun iha kontinente Asiátiku nia laran. Prezensa maktoban Sua Santidade Papa Francisco, iha tinan kotuk fortifika povu Timor oan nia fiar no hametin kultura hodi valoriza valores evangellu nu’udar ema fiar nain.” Dehan Arcebispu Metropolitana Díli
Dom Virgílio afirma Papa Francisco haree hetan roman ida ne’e iha timoroan sira-nia fuan, iha labarik, ferik no katuas roman evangellu ida ne’e sei fó roman kultura no roman sira hodi nune’e valor sira evangellu nian bele moris no hola isin iha timoroan nia fuan hodi transforma iha fiar ida de’it
“Ohin ita hamutuk iha ne’e nu’udar pursaun ki’ik ida husi povu Maromak nian iha rai Timor-Leste hanesan kreda ida hodi hasa’e ba Maromak Santa Missa Asaun de Grasa ida hodi selebra primeiru aniversáriu visita Papa Fransisco nian, iha vizita ne’e hatudu duni Maromak hanoin no haraik bensaun mai ita hotu liuhusi prezensa paterna Papa Francisco nian.” Arcebispu afirma
Arcebispu salienta vizita maktoban Papa Fransisco haburas Timoroan nia fiar ba Maromak, hametin domin entre Timoroan, tanba hetan grasa, Nai Maromak nian liuhusi vizita maktoban Papa Fransisco iha Timor-Leste. Maske nia la hamutuk ona ho sarani sira maibé, mai hodi hametin ema nia fiar ba Maromak haboot esperansa ba loron aban no haburas karidade ba malu.
Iha fatin hanesan representante sarania, Jaime Mendoça Lopes hatete sente kontente tanba selebrasaun tinan ida vizita Amu Papa Francisco mai Timor-Leste, bele halibur sarani katolika, maibé laran triste tanba vizita Timor-Leste seidauk too tinan ida Sua Santidade fila ona ba Aman Maromak nia kadunan Santu.
“Hanesn sarania ha’u sente kontente no triste, kontente tanba misa ohin ne’e bele halibur sarani katolika Timor-Leste iha fatin ida ne’e hodi hasae ita-nia fiar no selebra tinan ida vizita Sua Santidade Papa Francisco Mai Timor-Leste.” Representante sarani, Jaime Mendoça Lopes
Nia hatutan tinan uluk santu Padre mai iha ema barak mak mai desde dadersaan too misa hahu no remata, maibe tinan ne’e ema barak mai duni maibe lahanesan ho uluk, idak-idak lao mai, la sena malu, maibe misa hahu ema komesa barak hanesan tinan kotuk ne’e hatudu katak fiar hanesan sarani katolika
Esplika liután iha selebrasaun misa agradesimentu ida ne’e prezide husi Arcebispu Bispu Metropolitana Díli, partisipa husi Bispu Dioseze Baucau,hamutuk ho membru governu sira hotu, Padre, Madre, Militar, PNTL nomos sarani
Reportajen : Nelfiano
Foto : Nelfiano