Dili, 27 Maiu 2025 (Média Democracia) – Ministeriu Justisa asina nota entendimentu hodi koopera ho empreza Geomexsoft husi Korea Moderniza Servisu Nasionál Kadestrál nian iha Timor-Leste, atividade ne’e hala’o iha edifisiu Ministeriu Justisa Kolmera Dili.
Ministru Justisa, Sérgio Hornai hateten, Empreza Geomexsoft husi nasaun Korea do Súl servisu hamutuk ho Ministériu Justisa no Sekretáriu Estadu Terras, koopera ho empreza Geomexsoft husi Korea moderniza servisu kadestrál iha Timor-Leste liu-liu liga ba levantamentu rai.
“Governu Timor-Leste liuhusi ninia parseiru, tantu iha forma Governu ho Governu ka liuhusi ninia parseiru setór privadu sira atu haree kona-ba Polítika Governasaun ida ne’ebé orientadu ba iha polítika rejistu ba iha ita-nia rai, mós hatán ba iha preokupasaun relasionamentu ho rai.” Dehan Ministru Justisa, Sérgio Hornai
Ministru hatutan inisiativa sira-ne’e la’ós de’it kona-ba implementasaun software foun maibé oinsá atu harii kona- ba sistema informasaun reziliente liu, responsivu no konfiavel ba futuru. Liu-liu kria sistema justisa ida ne’ebé efisiente no transparente hodi fó benefisiu diretamente ba sidadaun sira hamenus atrazu, hadi’a no asesu ba informasaun legál, haburas konfiansa ba instituisaun.
Susesu implementasaun nota entendimentuida-ne’e sei presiza dedikasaun, servisu makaas, no kolaborasaun besik husi parte-rua. Ministériu Justisa iha kompromisu tomak atu fornese rekursu nesesáriu, apoiu no ambiente ida ne’ebé konduzivu ba Geomexsoft atu atinji objetivu sira ne’ebé trasa iha akordu ida-ne’e.
Iha fatin hanesan, Sekretáriu Estadu Terras no Propriedade, Jaime Xavier hateten, ohin asina MoU ho empreza Geomexsoft husi Korea, kna’ar ne’ebé nia simu ne’e atu garantia objetivu estratéjiku sira ba setór vitál nian iha rai laran .
“Modernizasaun ba ita-nia administrasaun rai no propriedade la’os de’it atualizasaun administrativa ida nia hanesan ai-riin fundamentál ida ba ita-nia nasaun nia dezenvolvimentu. Direitu seguru ba rai fó estabilidade ba família, atrai investimentu, fasilita kreximentu ekonómiku no esensiál ba prevensaun konflitu no koezaun sosiál nian.” Dehan Sekretáriu Estadu Terras no Propriedade, Jaime Xavier
Sekretáriu Estadu Terras no Propriedade ne’e hatutan, parseria ho empreza Geomexsoft reprezenta saltu ida ba oin iha abilidade atu aproveita teknolojia avansadu hodi kria sistema jestaun rai ida ne’ebé transparente, efisiente no konfiável.
“Timor-Leste presiza iha rejistu rai dijitál no informasaun espasiál sei tradús diretamente ba serteza legál ne’ebé forte liubá sidadaun sira, aumentu efisiensia ba funsionáriu públiku dedikadu sira, no ambiente ida ne’ebé atrativu liubá investidór doméstiku no internasionál sira.” Dehan Sekretáriu Estadu Terras no Propriedade
Nia afirma iha kompromisu atu haree kolaborasaun ida-ne’e buras no atu realiza potensiál tomak husi avansu teknolojiku sira-ne’e. Ida-ne’e hanesan investimentu ida ba ita-nia futuru, hodi garante katak jerasaun sidadaun Timoroan sira tuir mai hetan eransa sistema rai no propriedade ida ne’ebé metin, ekuitativu no kompetitivu iha nível mundiál.
Reprezentante Empreza Geomexsoft, Kyungham Lee hateten, ekipa sira hamutuk ho Sekretáriu Estadu rai no Propriedade hala’o ona estudu viabilidade ba sistema baze dadus kona-ba rai nian iha Timor-Leste, nune’e jerasaun foun sira bele hetan eransa sistema rai nian iha futuru
“Durante Fulan-sia nia laran ami mai iha Timor-Leste halo visibility study oinsá atu hadi’a sistema data base ba rai nian iha Timor-Leste. No durante fulan-sia ne’e ami mós hetan atensaun di’ak tebes husi Governu Timor-Leste no populasaun sira iha rai ida ne’e.” Dehan Reprezentante Empreza Geomexsoft, Kyungham Lee
Nia haktuir empreza refere halo ona learning infornation iha Timor-Leste inklui nasaun-lima seluk, no finansia ba projetu husi nasaun lima ne’e apoiu husi Governu Korea do Sul. Nune’e esperiénsia husi nasaun lima ne’ebé implementa projetu ne’e iha Timor-Leste ho di’ak
Esplika liután governu Timor-Leste liuhusi Ministeriu Justisa no Sekretáriu Estadu Terras no Propriedade servisu hamutuk Empreza Geomexsoft husi Korea do Sul, atu Moderniza Servisu Nasionál Kadestrál nian iha Timor-Leste.
Reportajen : Nelfiano
Foto : Nelfiano