Dili, 13 Maiu 2025 (Média Democracia) – Ministériu Justisa (MJ) fahe informasaun ba autór judisiáriu sira ligadu ho lei protesaun ba labarik kiikoan sira nomos ba joven sira bainhira sira iha perigu nia laran.
Iha entrevista ho Reprezentante Vise-Ministru Fortalesimentu Institusionál, Dinora Granadeiro hateten, semináriu ida ne’e atu divulga informasaun ba autór judisiáriu no instituisaun relevante sira ligadu lei no. 6/2023, 1 marsu atu halo protesaun labarik kiikoan sira nomos ba Joven sira iha situasaun perigu nia laran.
“Objetivu husi semináriu ida ne’e atu halo divulgasaun no halo diskusaun atu nune’e ita nia autór Judisiáriu no instituisaun sira ne’ebé iha kna’ar no responsabilidade ba iha implementasaun lei protesaun labarik no joven iha perigu hodi bele entende di’ak no bele implementa iha sira nia servisu liuliu iha sistema judisiáriu.” Hateten Dinora ba jornalisa sira hafoin abertura ba semináriu ne’e iha salaun sentru Formasaun Judisiária Caicoli, Segunda (12/05/2025)
Nia informa, kuandu semináriu ne’e remata sei halo mós modulu ida ne’ebé sei ko’alia kona-ba lei protesaun labarik no joven iha perigu ho modulu bele integra iha sentru Formasaun Judisiáriu hodi sai hanesan materia ida hodi fó formasaun ba autór judisáriu sira.
“Lei ne’e ita hotu hein iha tinan barak nia laran no ita konsege iha 2023, lei ida ne’e iha instituisaun responsabilidade sira no kna’ar atu implementa lei rasik seidauk hatene di’ak.” Nia dehan
Nia hatutan, partisipa iha semináriu ne’e mak husi Ministériu Justisa no autór Judisiáriu sira husi Tribunál, Prokuradória, MSSI, UNICEF, Juis no Guarda Prizaun sira inklui entidade relevante sira seluk tan.
Iha Sorin seluk, Prezidente Tribunál Rekursu, Afonso Carmona fundamenta katak, prinsipál husi semináriu ne’e atu hetan konteudu loloos ba lei ne’e hodi bele fó benefisiu ba labarik no joven sira bainhira iha situasaun perigu nia laran.
“Ita nia situasaun iha Timor, labarik no joven sempre hasoru situasaun perigu, oinsá husi semináriu ne’e atu hetan buat ruma husi konteudu lei ne’e, karik bele altera ligadu ho situasaun lei ne’ébé iha, para fasil ita aplika.” Hateten PTR Afonso Carmona
Entretantu, objetivu prinsipál husi semináriu ne’e atu sai nu’udar oportunidade atu halibur autór prinsipál sira iha sistema justisa no rede protesaun hodi aprofunda komprensaun kona-ba LPCJP, promove nia aplikasaun ne’ebé koerente no hametin kooperasaun inter-institusionál.
“Objetivu prinsipál sira husi semináriu, fó sai ho klaru no sistematiku konteúdu no ámbitu Lei No. 6/2023, loron 1 fulan-Marsu, Esklarese medida prosesuál no substantiva sira ne’ebé esensiál ba protesaun efetiva ba labarik no foin-sa’e sira iha situasaun perigu nian, halo diskusaun kona-ba dezafiu implementasaun prátika, fahe prátika di’ak no identifika solusaun komún no halo mapa kona-ba nesesidade formasaun no koordenasaun operasionál entre entidade sira, trasa planu asaun konjunta ida.” Hatutan PTR Afonso Carmona
Esplika kle’an liutan katak iha semináriu ne’e partisipante hamutuk haatnulu resin reprezentante husi autór judisiál sira, autoridade polísia sira, reprezentante autoridade públika no autór sosiál sira husi sistema protesaun ba labarik no foin-sa’e sira, nomos organizasaun sosiedade sivíl sira.
Reportajen : Domingas
Foto : Domingas