Dili, 8 Jullu 2025 (Média Democracia) – Ministériu Juventude Desportu, Arte no Kultura (MJDAK), liuhusi Koordenador Jerál Jogu Komunidade Nasaun sira ko’alia lian portugués (CPLP) asina memorandu of understanding (MoU), Ho RTTL. Ep ho nia objetivu hodi live streaming ba jogu CPLP, ne’ebe sei realiza iha semana oin.
Koordenador jerál jogu komunidade nasaun sira ko’alia lian portugués, Ataul Sekretariu Estadu Arte no Kultura, Jorge Soares Cristovão hateten, governu hili RTTL.Ep tanba empreza ida ne’ebé hetan finansiamentu mós husi estadu, akordu ida ne’e deside orsamentu oituan, laos orsamentu boot ne’ebé atu fó ba RTTL, maibe atu fasilita fasilidade balun ne’ebe RTTL la iha bele kompleta liután nomos parseiru internasional sira sei apoiu mós fasilidade tekniku.
“Nune’e orsamentu $50 mil, ne’ebé aloka ba RTTL atu apoiu ba servisu transmisaun direita ba jogu refere. Ita hotu hatene RTTL, iha esperensia ona oinsa mak atu halo jestaun ba media senter, hodi kanaliza output sira ba media sira tantu nasionál no internasionál, tanba esperensia hatudu iha vizita sua santidade papa francisco mai, RTTL konsege halo livestreaming ida ne’ebé ita haree katak di’ak tebes, ida ne’e mak ita hili sira, tanba ita so deside media ida de’it, atu sai nu’udar host, nune’e mak ita hili RTTL.” Dehan SEAK Jorge Soares Cristovão ba jornalista sira, iha CCD, segunda (07/07)
Sekretariu Estadu ne’e esklarese, laos tanba media sira seluk la iha kapasidade, maibé tanba parseiru husi governu nian, ida ne’e mak sira deside hili RTTL.
“Parte RTTL ho komisaun iha sub-seksaun ida ne’ebé atu haree kona-ba publisidade media komunikasaun, sira iha koordenasaun, komunikasaun, oinsa mak orsida iha estadiu atu tau kamera sira ne’e iha ne’ebé no jornalista sira atu hamrik iha ne’ebé. buat hirak n’e’ ekipa sira sei haree hotu ona.” Hatutan Sekretariu Estadu Arte no Kultura, Jorge Soares Cristovão
Nia subliña tan katak, ohin formaliza asina ida ne’e, maibé servisu tekniku lao tiha ona, hanesan loron hirak liubá, sira koko ekipamentus ne’ebé iha.
“Ita sei buka atu maksimiza buat hotu bele lao ho di’ak, maske ita hatene kondisaun no fasilidade ita la hanesan ho eventu internasionál sira ne’ebé ba jogu mundial ou jogu sira seluk, pelumenus ita bele transmite ba sosiedade katak ida ne’e mak atividade ne’ebé lao hela, nomos Timoroan sira iha rai liur no ema internasionál hakarak akompaña nune’e RTTL bele fasilita.” Subliña Sekretariu Estadu Arte no Kultura
Nune’e tuir informasaun ne’ebe Prezidente RTTL hateten katak output ne’e kuaze 20, tanba ida ne’e orsida media internasionál ita bele foti output ida-ida atu nune’e kontinua transmite liuhusi sira nia kanal rasik.
Iha fatin hanesan, Prezidente Radio Televizaun Timor-Leste empreza publiku, Elizeu Isaac Fernandes informa, RTTL ba dala uluk hetan konfiansa ida husi estadu, liuhusi komisaun organizadora ba CPLP hodi halo transmisaun direita ba eventu refere iha semana oin mai.
“Atu hateten ba ita hotu katak, RTTL 100 porsentu preparadu, ba ekipa sira hotu nomos komisaun ne’ebé RTTL kria hala’o komunikasaun ho parte hotu, no RTTL hetan mós ajuda husi entidade internasional sira hanesan, ABC Id, tanba ne’e atu hato’o ba ita-boot sira hotu katak, eventu CPLP haree ba parte boarcasting nian, RTTL prontu atu fó transmisaun ba eventu no modalidade sira ne’ebé sei realiza iha ita-nia eventu ida ne’e.” Dehan Prezidente Radio Televizaun Timor-Leste empreza publiku, Elizeu Isaac Fernandes
Nia hatutan katak, RTTL mós sei fasilita media sira seluk, oinsa atu hetan output hodi bele fornese informasaun ba komunidade sira, liuhusi ida-idak nia kanal.
“Ha’u hanoin katak ba media internasionál sira mós sei hetan partisipasaun masimu ba ita-nia eventu ida ne’e, tanba RTTL mós sei fasilita output ba media internasionál sira, atu nune’e eventu ne’ebé lao iha ita-nia rai bele heten mós atensaun husi mundu internasionál atraves husi kanal RTTL.” Hatutan Prezidente RTTL , Elizeu Isaac Fernandes
Prezidente ne’e mós afirma katak, RTTL liu ona prosesu lubuk ida, no halo trayout ba jogu balun ne’ebé oras ne’e lao hela iha Timor-Leste, ho akompañamentu tekniku internasional sira, Tanba ne’e atu dehan katak, RTTL prontu ona, no hein de’it jogu ne’e mai RTTL sei hatudu ninia profesionál, responsabilidade ba fiar ne’ebé governu.
Reportajen : Domingas
Foto : Media Officer MJDAK