Dili, 27 Fevereiru 2025 (Média Democracia) – Ministeriu Obras Publika (MOP) hamutuk ho Carama Comerçio Industria de Timor-Leste CCI-TL “sigla portuges” realiza enkontru no avaliasaun ba atividade servisu durante ne’e emprezariu nasional hala’o iha baze, atividade enkontru ne’e hala’o iha salaun Delta Nova Dili
Tuir Ministru Obras Publika (MOP) Samuel Marcal hateten, ohin realiza enkontru hanesan avaliasaun ida ba setor privadu sira hotu-hotu iha Timor-leste tanba setor privadu ne’e importante tebes ne’ebé hala’o parseiru hamutuk ho governu
“Setor privadu mesak Timor-oan ne’ebé governu tau hanoin tomak oinsá bele dezenvolve ita-nia setor privadu no kompañia nasional sira iha Timor-Leste. Tanba ne’e ohin realiza enkontru hodi rona sira-nia preokupasaun durante ne’e sira infrenta, nune’e governu bele ajuda no haree mós kona-ba problema governu nian, nune’e bele hadia setor privadu no nasional hodi dezenvove sira-nia aan ho di’ak.” Dehan Ministru Obras Publika (MOP), Samuel Marcal
Nia hatutan liuhusi enkontru ne’e setor privadu no nasional sira bele dezenvolve-aan di’ak liután, nune’e iha futuru iha kapasidade ne’ebé di’ak hodi loke investimentu no kampu traballu ba joven sira iha Timor-Leste
“Ita agradese tebes ba setor privadu no nasional sira mezmu ho kapasidade no kapital sei limitadu maibé sira nafatin esforsu-aan hodi dezenvolve. Tanba ne’e ohin rona motivasaun husi Primeru Ministru hirak ne’e atu espiritu foun ba sira hodi hamutuk ho governu hodi dezenvolve di’ak liután rai ida ne’e.” Dehan MOP
Nia salienta maske durante ne’e iha projetu 33 paradu ne’ebé kaer husi setor privadu no nasional sira, ne’ebé liuhusi enkontru refere ohin fó sai problema ne’e husi kompaña nia parte ka governu nian, karik iha setor privadu nia parte projetu ne’e tenke kansela ona tanba ne’e fó impaktu ba ezekusaun
“Tuir dadus projetu 33 paradu hela ne’ebé ohin enkontru hamutuk ho setor privadu no nasional sira atu fó notifikasaun ba sira karik laiha vontade atu atinji projetu refere, ita tenke kansela ona nune’e hodi tau fali osamentu ba programa foun. Tanba projetu ne’ebé paradu husi 2016 mai to’o agora.” Nia afirma
Iha fatin hanesan Prezidente CCI-TL Jorge Manuel de Araújo Serrano hateten, ohin enkontru avaliasaun hamutuk ho Ministeriu Obras Publika ho ekipa tomak iha vontade atu koalia hamutuk ho emprezaria konstrusaun sivil obras publika sira hodi haree kona-ba problema ne’ebé durante infrenta
“Ita hotu hatene katak Timor-Leste iha 80% barak liu moris husi konstrusaun sivil no obras publika empreza publikas. Entaun husi Ministru iha objetivu realiza enkontru alargadu ba dala haat ona, nune’e hotu-hotu bele rona koopresaun husi Carama Comerçio Industria de Timor-Leste atu mobiliza empreza sira iha Timor-Leste hodi haree kona-ba problema sai hela fukun ba projetu ne’ebé abandona hela.” Dehan Prezidente CCI-TL, Jorge Manuel de Araújo Serrano
Nia hatutan enkontru ida ohin hanesan avalisaun ba problema hirak ne’ebé durante ne’e empreza sira hasoru iha baze, nune’e liuhusi sorumutu ne’e bele hato’o ba malu hodi iha futuru bele dezenvolve di’ak liután
“Ohin enkontru avaliasaun no reflesaun ita hetan supreza husi Primeru Ministru maske iha ajenda la hola parte maibé hanesan grasa ida bele marka prezensa iha enkontru refere hodi fó hanoin ba MOP, CCI-TL no emprezaria sira hotu iha Timor-Leste.” Dehan prezidente CCI-TL
Esplika liután, lori Carama Comerçio Industria de Timor-Leste CCI-TL nia naran hakarak hato’o agradese ba Pimeru Ministru no Ministeriu Obras Publika iha vontade di’ak no inisiativa hakarak komunika hodi realiza enkontru alargadu ho di’ak, fiar katak ba futuru servisu hamutuk hodi halo dezenvolvementu ba Timor-Leste.
Reportajen : Nelfiano
Foto : Nelfiano