DILI, 05 marsu 2026 (Média Democracia)— Ministériu Saúde Diretora Nasionál Rekursu Humanus Mary Christavaria Lopes hateten Ministériu Saúde iha tinan ne’e fó oportunidade ba profisionál saúde 25 hodi kontinua sira nia estudu ba Pos-Graduasaun iha Universidade Nasionál Timor Lorosa’e (UNTL).
Diretora Nasionál Rekursu humanu iha MS hateten MS asina MoU ho INSPTL PHD atu fasilita kursu pos-graduasaun ba profisional saude sira hodi kontinua estudu iha pos-graduasaun durante tinan 2.
“Bazeia ba asina nota memorandu no MoU ne’ebé mak hahú entre INSPTL PHD no mós Hospitál Nasionál Guido Valadares ho Ministériu Saúde atu fasilita kursu Pos-Graduasaun ba profisionál saúde sira hodi prienxe ba fasilidade saúde iha Timor-Leste iha tinan ne’e Ministériu Saúde sei fó tan oportunidade ba profisionál saúde na’in 25 atu kontinua sira nia estudu iha Pos-Graduasaun durante tinan rua,”
Diretora ne’e mos haktuir katak bazeia ba apoiu akordu ida ne’e hahú kedas iha tinan kotuk, kada tinan Ministériu Saúde hakarak atu hahú forma ona Medisina Família Integradu hodi koresponde ba nesesidade kuidadu saúde primaria nian.
Nia hatete tuir tarjetu husi Ministériu Saúde kada tinan tenke iha profisionál saúde hamutuk na’in 25, maibé iha tinan kotuk iha de’it na’in 23 mak dadaun ne’e kontinua hela sira-nia aprendizajen.
“Ita hahú iha tinan kotuk hahú ona ho 25 pessoas tuir tarjetu ne’ebé maka ita hakarak, maibé prosesu rekrutamentu, selesaun dokumentus to’o finál ita hetan 24 kandidatu na’in ida la pasa no na’in ida resigna aan rasik, entaun iha 23 kandidatu ne’ebé mak agora dadaun sira iha hela faze segundu ano ba iha prosesu aprendizajen nian,” dehan Mary christavaria Lopes
Nia mos haktuir tan katak kona ba nia prosesu ne’e normál no baibain Ministériu Saúde halo kolaborasau ho Universidade Nasionál Timor-Leste no dadaun sira hahú halo pedidu ba UNTL atu bele loke ba vaga refere.
” Ami submente ona pedidu ba UNTL atu bele loke vaga ba iha prosesu rekrutamentu sira, ami fasilita de’it iha selesaun dokumentus no infomasaun sira-ne’e mós ita hato’o ona ba Diretór Munisípiu sira, sira nia rekezitu sira ne’ebé mak fo sai iha ne’ebá ami públiku ona iha pájina Palásiu da Cinzas, depois halo selesaun dokumentus liu husi ekipa de juri sira ne’ebé mak kompostu husi parte relevante sira deside hamutuk iha Instituisaun haat, orsida selesaun hotu depois mak ita tama ba prosesu kontínuasaun,” dehan nia
Nia konklui katak vaga ne’e rasik ita públiku ona ita hanoin to’o iha dia 31 Marsu kandidatu hotu-hotu, submente ona ita-nia alvu ka tarjetu ita hakarak ba iha tinan ida-ne’e ba iha Munisípiu 11, SSM Ataúru, Aileu, Ainaru, Bobonaru, Baucau, Covalima, Ermera, Lautém, Liquiça, Manufahi,Viqueque ezeptu liu Dili. Tanba ita hatene katak Dili ne’e Sentru bele asesu hotu ba ospitál nasionál, entaun ita fó uluk prioridade ba Munisípiu ne’ebé mak ami mensiona 25, vaga ne’e ita públika fó tempu too iha 31 Marsu, maibé bainhira ita haree aplikante sira husi Munisípiu relevante sira la hetan informasaun klaru mak sira la aplika no nafatin sei fó oportunidade atu sira bele aplika,
Reportajen : Nélia
Foto : pajina facebook palacio das cinzas