Dili, 26 Agostu 2025 (Média Democracia) – Governu Timor-Leste liuhusi Ministériu Solidaridade Sosiál no Inkluzaun (MSSI) ho Programa Ai-han Mundiál (PAM) asina akordu hodi suporta programa Protesaun Sosiál atu Kombate Ra’es-Badak ba Labarik. Informasaun hirak ne’e Média Democracia asesu husi komunikandu imprensa iha Pajina MSSI, Tersa-feira semana ne’e.
Ministériu Solidariedade Sosiál no Inkluzaun (MSSI), Veronica das Dores hateten, Programa Ai-han Mundial Nasoens Unidas (PAM) asina ona memorandu entendimentu ida hodi suporta programa Bolsa da Mäe Kondisional ba Saúde Nutrisaun Inan no Oan (BdMK_SANUTRIO), inisiativa ho objetivu atu prevene ra’es-badak ba labarik sira tinan tolu mai kraik husi familia vulnerável sira iha Timor-Leste.
“Programa pilotu ida-ne’e sei implementa husi MSSI ho kolaborasaun besik ho PAM nо instituisaun governu sira seluk hanesan Ministériu Saúde no Institutu Nasional Estatistika Timor-Leste, ho Banku Dezenvolvimentu Aziátiku (ADB). Ida-ne’e sei hala’o husi tinan 2026 to’o 2028 iha Munisipiu Covalima, Ermera no Oecusse, ho alvu ba populasaun (feto isin-rua, inan fó susu no labarik) sira ne’ebé vulnerável liu durante loron 1,000+ nia laran, hahú husi isin-rua to’o labarik tinan tolu.” Dehan Ministra Solidaridade Sosiál no Inkluzaun Veronica das Dores
Ministra hatutan, implementa Bolsa da Mãe Kondisional SANUTRIO nu’udar pasu importante ida hodi asegura katak laktente/bebé, labarik no inan husi familia vulnerável sira hetan kuidadu no nutrisaun neʼebé sira presiza, inklui apoiu kustu ba transporte liuhusi transferénsia osan kondisional. Liuhusi investe iha sira-nia saúde ohin loron, ita hadia ema ne’ebé saudável no forte liubá ita-nia futuru nasaun nian.
“Timor-Leste kontinua hasoru alarma kona-ba taxa malnutrisaun, ho 46.7% husi labarik tinan lima mai kraik sofre husi ra’es-badak.” Hatutan Ministra Solidaridade Sosiál no Inkluzaun
Ministra afirma Programa Bolsa da Mãe Kondisional SANUTRIO buka atu rezolve dezafiu ida-ne’e liuhusi aprosimasaun multisetoriál, hodi fó protesaun sosiál no plataforma saúde nian hodi fornese ai-han nutritivu espesializadu no servisu esensial sira ba inan isin-rua no fó-susu sira no labarik sira ho idade fulan 6-35.
Iha fatin hanesan Reprezentante PAM/WFP iha Timor-Leste, Jacqueline de Groot hateten, PAM hakarak estende ninia kooperasaun servisu ho MSSI, hodi progresivamente implementa projetu ida-ne’e iha Timor-Leste.
“Ita kontinua kria komunikasaun ida-ne’ebé iha ninia kontinuidade atu lori susesu ba implementasaun programa BdM Kondisionál SANUTRIO. Nune’e mai ita hotu servisu hamutuk hodi kombate stunting iha Timor-Leste.” Dehan Reprezentante PAM/WFP iha Timor-Leste, Jacqueline de Groot
Reprezentante PAM/ WFP ne’e hatutan, sente onra tebes tanba hetan konfiansa nu’udar ajénsia prinsipál ida kona-ba nutrisaun no seguransa ai-han. Governu hili ona atu implementa hamutuk programa ne’e la’os de’it kontribui ba kombate malnutrisaun maibé mós hametin sistema protesaun sosial iha rai-laran.
Esplika liután, programa atividade ne’e foka liubá hadi’a nutrisaun inan no oan nian, suporta feto/inan isin-rua saudável hodi hamenus bebé ne’ebé moris ho todan, hamenus anemia nomos hasa’e konsiénsia kona-ba prátika saúde nian. Inisiativa ida-ne’e marka pasu signifikativu ida iha Timor-Leste nia esforsu atu hakotu siklu interjerasaun malnutrisaun no harii futuru ida-ne’ebé saudável ba ema hotu.
Reportajen : Nelfiano
Foto : Media MSSI