Dili, 07 Agostu 2025 (Média Democracia) – Ministériu Solidariedade Sosiál no Inkluzaun (MSSI), liuhusi nia Diresaun Institutu Nasionál Seguransa Sosiál (INSS), halo lansamentu ba aplikasaun sistema online ba módulu kontribuisaun seguransa sosiál, lansamentu seremonia ne’e hala’o iha Salaun Oka, tersa feira semana ne’e.
Ministra Solidariedade Sosiál no Inkluzaun, Veronica das Dores hateten, ohin realiza atividade halo lansamentu ne’e ho objetivu atu fasilita kontribuisaun empregadór no traballadór sira nian ba seguransa sosiál.
“Bainhira aplikasaun ida ne’e seidauk lansa, susar tebes ba ema atu fila loron-loron, tanba ne’e ema ida ka rua de’it mak halo servisu, ne’e lori tempu naruk, tanba ne’e ohin loron iha mundu dijitál ita prefere kria sistema ida hodi ajuda empregadór sira hatene sira nia osan.” Tenik Ministra Solidariedade Sosiál no Inkluzaun, Veronica das Dores
Ministra MSSI hatutan Governu realiza lansamentu ba Aplikasaun Sistema Online Seguransa Sosiál IX Governu Konstitusionál liuhusi Institutu Nasionál Seguransa Sosiál (INSS), ne’ebé tutela ba Ministériu Solidariedade Sosiál no Inkluzaun (MSSI), hala’o lansamentu kona-ba Sistema Online ba Módulu Kontribuisaun Seguransa Sosiál, iha ne’eba sai nu’udar pasu importante ida iha jornada atendimentu públiku iha ámbitu seguransa sosiál nian.
Iha diskursu, Ministra Solidariedade Sosiál no Inkluzaun, Verónica das Dores dehan, aplikasaun módulu online ne’e ninia objetivu xave mak, atu hakbesik no hafasil setór públiku no privadu ho sistema kontribuisaun regulár traballadores sira nian ho efetivu no lais. Aplikasaun ida-ne’e mós sei kontribui ba redusaun tempu ba traballadór no empregadu sira, liuliu bainhira hala’o reajustamentu ba dadus traballadór sira nian.
Iha fatin hanesan prezidente INSS, Arlindo Pinto hateten, aplikasaun ne’e hanesan dijitaliza prestasaun servisu ba públiku no iha objetivu lima.
“Objetivu dahuluk atu fasilita enviu informasaun diretamente husi empregadór sira, husi ninia rekursu umanu rasik, iha objetivu daruak mak atu fasilita empregadór sira atu hasai sira-nia boletin pagamentu rasik. Objetivu datoluk fasilita empregadór sira atu haruka sira-nia dokumentu rasik, objetivu dahaat fasilita entidade atu halo operasaun no fornese informasaun no dalimak fasilita entidade sira atu rejista traballadór sira.” Dehan Prezidente INSS, Arlindo Pinto
Prezidente INSS hatutan, ohin kontinua halo lansamentu ba módulu kontribui sira ne’ebé kontribui ona ba regularizasaun traballadór sira nian, nune’e bele fasilita rekursu umanu hotu iha liña Ministerial ida-idak nian, tanba buat hotu daudaun lao ho mudansa teknolojia.
“Dezenvolve ona sistema finanseiru internu ba pensaun nomos planu atu integra sistema saldu livre. Tanba ita-nia lei seguransa sosiál mós hateten katak ita iha ita-nia setór finanseiru rasik no ita-nia sistema rasik atu regulariza ita-nia sistema finanseiru seguransa sosiál nian.” Hatutan Prezidente INSS
Prezidente INSS mós akresenta liuhusi sistema módulu kontribuisaun ne’e bele fó tulun ba atendimentu públiku liu-liu iha entrega dokumentu husi empregadór sira atu labele ba diretamente iha INSS, maibé bele entrega liuhusi sistema online nian.
Esplika liután partisipa iha serimónia lansamentu ida-ne’e husi Prezidente Tribunál Rekursu, Prezidente Komisaun C Parlamentu Nasionál no membrus IX Governu, Reprezentante PNTL no F-FDTL, parseirus dezenvolvimentu no ajénsia telekomunikasaun sira iha Timor-Leste, Jerente no funsionárius husi INSS-FRSS.
Reportajen : Nelfiano
Foto : Nelfiano