Dili, 25 Juñu 2025 (Média Democracia) – Ministériu Solidariedade Social no Inkluzaun (MSSI) akompaña liuhusi Banco Nasional Comercio Timor-Leste BNCTL “sigla portuges” realiza konferensia Imprensa kona-ba Pagamentu Programa Bolsa da Mãe Kondisional primeira faze tinan 2025. Konferensia ne’e hala’o iha edifisiu sentral MSSI Caicoli Dili, tersa-feira semana ne’e.
Ministra Solidariedade Social no Inkluzaun (MSSI), Veronica das Dores hateten Programa Bolsa da Mãe Kondisionál nu’udar programa governu nian neʼebé kontinua implementa hahú husi tinan 2008 bazeia ba Dekretu Lei númeru 18/2012, de 4 de Abril.
“Dekreitu Lei ida-ne’e hetan alterasaun iha fulan Janeiru 2024 tuir Dekretu Lei númeru 1/2024, de 3 de Janeiro hodi halo mudansa ba montante orsamentu ba estudante benefisiáriu sira iha Dekretu Lei anterior iha artigu 10 no artigu 11. Nune’e, Subsidiu Bolsa da Mãe ba benefisiáriu sira hanesan tuir mai ne’e.” Dehan Ministra Solidariedade Social no Inkluzaun (MSSI), Veronica das Dores
Ministra hatutan Subsídiu kada fulan ba estudante benefisiáriu sira hanesan, estudante sira husi Ensinu Báziku siklu dahuluk no daruak $ 8.00. Estudante sira husi Ensinu Báziku siklu datoluk $ 9.00. Estudante sira husi Ensinu Sekundáriu Jerál no Tékniku Vokasional $ 10.00. Estudante sira ho defisiensia sei hetan tan orsamentu adisional $ 5.00.
Ohin, dia 24 de Juñu 2025, MSSI aprova lista benefisiáriu sira ne’ebe elijivel ba pagamentu faze dahuluk neʼebé sei hala’o dentro de fulan Jullu 2025. Bazeia ba tetu orsamentu 2025, orsamentu ne’ebé MSSI aloka ba Bolsa da Mãe Kondisionál ho montante $ 7,000,080.00 (Sete Milões e Oitenta Dolares Americano)
“Ministra informa montante husi orsamentu ne’e, MSSI sei halo pagamentu ba faze dahuluk nian ho montante orsamentu $ 4,199,708.00 (Quatro Milões e Cento Noventa e Nove mil Sete Centos e Oito Dolares Americano) ba estudante benefisiáriu sira ho total: 40,279 (Quarenta mil Duzentos e Setenta e Nove beneficiarios).” Dehan Ministra MSSI
Nia afirma, klasifikasaun estudante benefisiáriu sira ba pagamentu dahuluk tuir nivel hanesan iha Ensinu Báziku Siklu Dahuluk no Daruak, Total benefisiariu hamtuk 20,178 total orsamentu hamutuk $1,952,866.00. Iha Ensinu Báziku Siklu Datoluk total benefisiariu hamutuk 14,994, total orsamentu $ 1,629,864.00. Aleinde ne’e iha Ensinu Sekundáriu Jerál no Tékniku Vokasionál total benefisiariu 5,107 total orsamentu $616,978.00.
Entertantu família benefisiáriu sira, se pagamentu iha fulan Jullu ne’e mak naran laiha ka la konsege simu, bele hato’o reklamasaun mai MSSI atu nune’e MSSI bele ajusta ba pagamentu faze daruak nian neʼebé sei hala’o iha trimestre ikus 2025.
Esplika liután relasiona ho Pagamentu Programa Bolsa da Mãe Kondisional primeira faze tinan 2025 fó hatene ba públiku hahú dia 1 de Jullu 2025, MSSI sei halo rejistu foun ba tutor no benefisiariu estudante sira iha teritóriu Timor-Leste. Sei halo pagamentu ba benefisiariu sira-ne’e ba faze daruak nian iha trimestre ikus 2025.
Reportajen : Nelfiano
Foto : Nelfiano