Dili, 24 Janeiru 2025 (Média Democracia) – Ministru Transporte no Komunikasaun (MTK), halo klarifikasaun kona-ba orsamentu ne’ebé aloka ba konstrusaun parajen ba transporte públiku hamutuk 10, ne’ebé hari’i husi empreza Carisma Unipessoal Lda. Klarifikasaun ne’e halo iha MTK Kaikoli.
Tuir Ministru Transporte no Komunikasaun (MTK) Miguel Marques Manetelo hateten, iha publikasaun nutísia husi Ajénsia Tatoli foin lalais kona-ba konstrusaun parajen públiku sanulu iha Dili ho montante orsamentu $96 mil ne’e klaru hela, tanba iha ne’ebá hateten progresu serbisu foin atinje 35%, enkuantu públiku barak mak kestiona ho nia orsamentu bo’ot ne’e.
“Atu klarifika katak prosesu konstrusaun ba parajen transporte públiku ne’e naruk, tanba husi Ministériu prepara dezeñu, planta no kadernu enkargu (BoQ), hotu mak aprezenta ba Ministériu Obras Públika (MOP) haree hodi halo verifikasaun no lori bá Ajénsia Dezenvolvimentu Nasionál (ADN) halo mós verifikasaun ba dezeñu, liuliu haree kustu ne’e hira mak foin loke konkursu públiku.” Dehan Ministru Transporte no Komunikasaun MTK Miguel Marques Manetelo
Nia esplika katak konkursu Públiku ne’ebé halo ho montante orsamentu $96 mil ne’e bazeia ba verifikasaun husi ADN.
“Konkursu públiku ne’ebé ita halo ho montante orsamentu rihun $96 ne’e bazeia ba verifikasaun husi Ajénsia Dezenvolvimentu Nasionál, la’ós Ministériu mesak mak halo. Kouta sasán ne’ebé iha ne’e la’ós hola iha rai-laran, maibé husi rai- liur.” Dehan Nia
Nia salienta katak públiku bele buka hatene no le’e iha nutisia Tatoli, nune’e bele hatene lolos nia prosesu servisu no nia sasan ne’e mai husi rai liur tanba ekipamentu balun uza ba ema ho defisiénsia iha trotoár leten, liuliu defisiénsia ho kadeira-roda.
“Hakarak klarifika ba públiku bele haree nutísia Tatoli iha ne’ebá hateten konstrusaun foin atinje 35% katak hela 65%, signifika konstrusaun progresu seidauk hotu tanba parajen ne’e rasik sei harii hotu ho ekipamentu ba ema ho defisiénsia iha trotoár leten, liuliu defisiénsia ho kadeira roda ne’e.” Nia klarifika
Governante ne’e sujere bainhira ema ho defisiénsia ruma atu sa’e kareta, sira la presiza la’o maibé hein de’it iha parajen kareta nian no sira ho kadeira-roda dudu tama ba karreta laran de’it. Entretantu konstrusaun parajen públiku uma 10 ne’e foin mak atinje 35% sei hela 65%, no montante orsamentu $96 mil.
Reportajen : Tomas
Foto : Media Officer MTK